Más de cien artistes van llevar la cultura asturiana al Festival Interceltique de Lorient

Muyeres, col so espectáculu 'País Malva', y Corquiéu son los referentes de la delegación asturiana nel XLVI Festival Interceltique de Lorient, qu'esti añu ta dedicáu a Australia. La Banda de Gaites La Laguna del Torollu y el Grupo Folklórico Trebeyu son les formaciones que viaxen esti añu a Breizh.

Iñaki Santianes, xefe de la delegación asturiana, va ser el primeru n'intervenir nesta edición del festival, que va celebrase ente'l 5 y el 14 d'agostu. Va ser el sábadu 6, nel Palais des Congrès a les 10 hores, con una clase maxistral de gaita xunto col gallegu Pablo Seoane. A la mesma hora va principiar el XXII GolfCelTrophy, con presencia asturiana.

La Laguna del Torollu y Trebeyu van debutar nesta xornada –na que tamién va celebrase'l Trophée Mac Crimmon– na primer Nuit Interceltique Bretagne (sábadu, domingu, martes, miércoles y xueves), les Nueches Máxiques del Stade du Moustoir. Mentes, al día siguiente, uviedinos y xixoneses van representar al país na Gran Parade des Nations Celtes, el desfile qu'axunta a miles de persones nes cais d'An Oriant y que va principiar a les 10 hores.A les 21 hores, nel Grand Théâtre, va tener llugar la presentación en Breizh del espectáculu 'País malva' nuna sesión na que Muyeres va compartir escenariu colos llocales Duo du Bas. Mentes, Corquiéu va actuar el llunes, a les 21.30 nel Palais des Congrès, xunto colos escoceses Barluath, y el martes, a les 21.30 hores na Quai de la Bretagne nun conciertu nel que tamién van participar los bretones Dour Le Pottier Quartet y Tymen Kerveillant Quintet.

Espace Marine

Dientro del ciclu Musiques et Danses des Pays Celtes, que se desendolca nel Espace Marine –l'escenariu principal del festival–, va actuar Trebeyu'l martes a les 14.30 hores xunto colos irlandeses Ballingeary Pipe Band y Planxty O Rourke. Mentes, La Laguna del Torollu va intervenir el miércoles a la mesma hora xunto cola formación córnica Bolingey Troy, la neozelandesa The Highland Dance Company y la escocesa Winnipeg Police Pipe Band.

L'acordionista Marcos García va intervenir el vienres, primero nuna clase máxistral d'acordión  a les 10 hores nel Palais des Congrès, xunto a los bretones Etienne GrandJean Gruppetto, y depués, yá de nueche, a les 21.30 hores, nel mesmu escenariu nun conciertu nel que van participar los tamién llocales Duo Etienne Grandjean et Soïg. Mentes, los encargaos de zarrar la participación asturiana nesta edición del festival va ser Trebeyu na actividá 'Danses du Monde Celte', a les 14.30 nel Espace Marine, xunto colos córnicos Bolingey Troy, los gallegos Grupo de Baile Brincadeira, los escoceses Keltika Dancers, los maneses Ny Manninee y los irlandeses Planxty Or Rourke.