Más de 1.500 persones participaron na manifestación antitaurina de Xixón

L'Asociación Nacional Animales con Derechos y Libertad (Anadel) convocó esti domingu una manifestación en Xixón contra los festexos taurinos, con más de 1.500 asistentes. Esti tipu de concentraciones, sicasí, nun son nueves: nel 1914 la Sociedad Antiflamenquista axuntó a miles d'antitaurinos n'El Coto.

Cuarenta coleutivos y partíos políticos sofitaron la manifestación, que tuvo salida na plazuela San Miguel y final frente a la plaza de toros, onde les fuercies de seguridá acutaron una zona pa separtar a los animalistes y a los aficionaos qu'entraben n'El Bibio pa presenciar la corrida correspondiente a la Feria de Begoña. La marcha tornó a aumentar en númberu en comparanza con años pasaos, superando los 1.500 asistentes.

Esti tipu de concentraciones recientes contra los festexos taurinos, sicasí, nun son novedoses na ciudá. Ta documentao que'l 15 d'agostu del 1914, la Sociedad Antiflamenquista Cultural y Protectora de Animales y Plantas entamara una xira n'El Coto pa protestar contra los toros n'El Bibio, axuntando a más de 4.000 persones.

manifestacion_antitaurina_1914.jpg

Asina, queda constancia del refugu qu'esti tipu d'actividaes tuvieron dende siempre n'Asturies ente la población. Gaspar Melchor de Xovellanos yá destacaba en 'Memoria para el arreglo de la policía de los espectáculos y diversiones públicas, y sobre su origen en España' cómo estos festexos nun teníen raigañu en tolos puntos del Estáu y cómo nun suponía una diversión pa gran parte de la población.

D'igual forma, la construcción d'El Biblio nel 1888 vendióse como un reclamu turísticu, non como una demanda de los xixoneses. Inclusive, anguaño, gran parte de los asistentes a la Feria de Begoña, la única del país, son procedente de fuera, nun consiguiendo siquier asina enllenar la plaza de toros.

Podemos llevará los toros a la Xunta Xeneral

El grupu parllamentariu de Podemos Asturies llevará a la Xunta Xeneral nel cursu políticu nuevu' l debate sobre la tauromaquia, según confirmó'l diputáu Héctor Piernavieja tres la manifestación antitaurina. "Cada vez somos más les persones qu'entendemos que nun ye ético nin razonable disfrutar cola tortura de los animales y por eso tamos güei –pol domingu– equí sofitando la manifestación d'ANADEL contra la Feria de Begoña. Tamos totalmente concienciaos con esti tema y nos meses próximos veremos nel Parllamentu asturianu iniciatives pa garantizar los derechos de los animales".

Na semeya, Piernavieja na salida de la manifestación.