Martínez Oblanca repite como candidatu de Foro al Congresu

La formación asturiana, en coalición col PP, propón a Camino Gutiérrez pal Senáu.

La Comisión Direutiva de Foro decidió ayeri por unanimidá nomar al diputáu Isidro Martínez Oblanca como candidatu del partíu al Congresu. El xixonés va ocupar, según marca l'alcuerdu de coalición col Partido Popular (PP), el númberu 2 d'una llista que va liderar Paloma Gázquez.

El númberu 6 ye l'otru puestu que-y correspuende a Foro, que va ocupar Carmen Paloma Noriega, conceyala en Ribeseya. La coalición Foro-PP algamó nes eleiciones anteriores, cuando Asturies escoyía 8 representantes, uno más que na convocatoria del 28 d'abril, 3 diputaos.

Cámara Alta

Onde Foro va renovar la so representante ye nel Senáu. Camino Gutiérrez Gutiérrez, secretaria xeneral de Foro Uviéu, va ocupar el puestu númberu 3 de la llista en sustitución de la senadora Rosa María Domínguez de Posada.

Nel 2016 PP-Foro sumó 3 de los 4 senadores que correspuenden a Asturies, polo que de repetise resultaos la formación asturiana va caltener el so representante na Cámara Alta. Va lliderar la llista de la coalición conservadora nesta ocasión Ramón García Cañal, con José Manuel Rodríguez González 'Lito' como númberu 2.