Foro y PP reediten la so coalición pa les Estatales

El partíu asturianu va tornar a ocupar el númberu 2 de la llista conservadora.

Carmen Moriyón, presidenta de Foro y candidata a les Nacionales del 26 de mayu, y Pablo Casado, presidente del Partido Popular (PP) y candidatu a la presidencia del Gobiernu d'España nes Estatales del 28 d'abril, roblaron ayeri n'Uviéu l'alcuerdu de coalición ente les dos formaciones de cara a la cita del mes próximu. D'esta forma PP y Foro reediten el pautu de 2015 y 2016, una circunstancia que nun se repite nes eleiciones asturianes.

"Úfrote la pallabra de Foro de cumplir los compromisos que güei reeditamos. Y fáigolo col meyor aval p'acreitar que somos una alternativa de fiar pa los asturianos, que va muncho más allá de les nueses pallabres; refiérome a les pruebes de que cumplimos nel 2015 y nel 2016 les nueses promeses, y de que volveremos a cumpliles nel 2019 sofitando al to Gobiernu p'aplicar esti programa", treslladó Moriyón a Casado. L'alcuerdu afita una serie de puntos propuestos pola formación asturiana, ente los que destaquen un modelu de financiación autonómica nuevu, l'apertura inmediata de la variante de Payares con víes d'anchu européu, el cumplimientu del Plan de Víes de Xixón, recuperar l'Autopista del Mar con Naunnt-Saint-Nazère y un Plan de Transición Enerxética "gradual bien estudiáu, meditáu y consensuáu" con plazos más amplios.

Casado, pela so parte, destacó l'alcuerdu ente dos fuercies “constitucionalistes, patriótiques y responsables" y apuntó'l so deseo de reeditar l'alcuerdu eleutoral con Foro "por compartir los mesmos principios, valores y ambición de futuru pa España, que ye indisociable del d'Asturies”. La coalición PP-Foro, hai que recordar, nun foi defendida pola so candidata pa la presidencia d'Asturies, Teresa Mallada, siendo la so gran abanderada Mercedes Fernández, presidenta del PP nel país.

El 3 pal Senáu

Foro va llevar los puestos 2 y 6 de la llista al Congresu, lo que, salvo sorpresa, aseguraría-y representación nel Congresu nunes eleiciones nes qu'Asturies pierde un diputáu por mor de la baxada de población, tocando-y 7 representantes na Cámara Baxa. Previsiblemente, repetirá como diputáu Isidro Martínez Oblanca.

Pal Senáu, el PP resérvase los puestos 1 y 2, mentes que Foro va ocupar el númberu 3, al igual que nel 2016. Anguaño tien na Cámara Alta a Rosa María Domínguez de Posada.

Semeya propiedá de Foro.