Manuel Menéndez va per primer vez en venti años a la Xunta... pero nun gorguta

|
Manuel Menéndez va per primer vez en venti años a la Xunta... pero nun gorguta

El PSOE acusa a Podemos de someter al conseyeru delegáu de Liberbank a un "tercer grau"- Pa la formación morada que PSOE y PP nun entrugaren nada a Menéndez "confirma el pactu del duernu".

Esta mañana el Conseyeru Delegáu de Liberbank, Manuel Menéndez, sentóse na tribuna de comparecientes na Comisión de Facienda de la Xunta Xeneral, nun fechu que Podemos, a traviés del so Secretariu Xeneral Daniel Ripa, calificó de "históricu", al ser la primer vegada en venti años que Menéndez da esplicaciones al Parllamentu asturianu.

Sicasí, Menéndez nun gorgutó énte les más de les preguntes que fixeron tanto Emilio León, en representación de Podemos, como Pedro Leal de Foro, apelando a la so presencia na comisión como patronu de la Fundación Cajastur.

Dende Podemos recordóse na comparecencia que "Menéndez, ye anguaño'l dirixente del octavu bancu más importante d'España y lleva más de venti años al frente de Cajastur, pesie que nel so momentu los estatutos de la entidá nun lu dexaben tar más d'ocho años".

Según la formación morada "como presidente de la Fundación Bancaria Cajastur, qu'anguaño tien el 30% de la participación de Liberkank pero más del 45% de la posición del votu nel conxuntu del bancu, tien d'esplicar énte Parllamentu asturianu les consecuencies de la so xestión.

Emilio León calificó el fraude de les preferentes y la privatización de Cajastur como "el mayor atracu de la historia d'Asturies" y criticó "la integración de Cajastur en Liberbank, la liquidación de la Obra Social y Cultural, los problemes llaborales cola plantía y el pieslle d'oficines" que ponen en peligru, según el diputáu de Podemos, la vertebración social del país. 

Amás aseguró que "sumióse una caxa d'aforros con un fuerte calter social pa tresformase nel bancu que más families desapolina n'Asturies".

Foro critica la deslocalización

Pel so llau, el portavoz de Foro, Pedro Leal, tres de la intervención comentó que “Manuel Menéndez refugó dar esplicaciones pola deslocalización de CajAstur, cola connivencia del PSOE".

Según el portavoz forista "la reconversión de la estinta Caja de Ahorros traxo como consecuencia la perda de control asturianu, de emplegu, d'ingresos fiscales, de créditu pa la xente asturiano, y prácticamente'l pieslle la Obra Social y Cultural".

PSOE y PP nun faen entrugues

Mientres que IU y Ciudadanos entrugaron a Menéndez sobre distintes cuestiones rellacionaes col compromisu de la entidá con Asturies, la Obra Social y Cultural,o l'apoyu al centru de Soft Computing, PSOE y PP quixeron más nun facer entrugues, no que Podemos interpretó como "una preba de la existencia del pautu del duernu".

La diputada del PSOE Margarita Vega, criticó el "tercer grau" al que se taba sometiendo a Menéndez y pidió dixebrar la "señardá" del debate políticu.

 

Contador Estadistiques