Liberbank, marca del bancu nuevu del que forma parte Caxastur

El bancu que conformen, tres la fusión, Caxastur, Caja Cantabria y Caja de Extremadura, yá tien nome. Liberbank va ser la marca comercial d’esta entidá que va utilizase fuera de los territorios orixinales de les trés caxes d’aforros y CCM.
 
La razón social del bancu de les trés entidaes, Effibank, tamién va ser reemplazada pola nueva marca comercial Liberbank, según indicaron a Europa Press fontes del conseyu de la entidá. El bancu tien un volume d'activos de más de 50.000 millones y declara una posición de cimera en cuatro comunidaes autónomes gracies a l’absorción de Caja Castilla-La Mancha (CCM) por Caxastur, con una cuota de mercáu del 20 por cientu.
 
Liberbank va disponer d’una presencia en tol Estáu de 1.200 oficines y más de 5.500 emplegaos. El bancu nuevu, a datos a pieslle del 2010, goza d’un capital principal del 8,4 por cientu, contabilizada yá la merma derivada de la provisión del plan de prexubilaciones –más de 200 millones d’euros– y los axustes por perda esperada.