L'Uviéu-Sporting va ser n'asturianu en RPA

|
Sporting 1-1 Uviéu (9 de setiembre del 2017)

La radio pública prepara una programación especial con motivu del derbi asturianu.

El domingu, a les 18 hores, va disputase'l segundu asaltu del partíu más esperáu polos aficionaos del Uviéu y del Sporting. Torna'l derbi al Carlos Tartiere Nuevu casi 15 años depués y la RPA va comentar el partíu n'asturianu.

Pa ello va a entamase una retresmisión conxunta na que Miguel Fernandi va narrar los ataques del Uviéu y Toño Aguiar, los del Sporting, colos apoyos d'Armando y Eloy Olaya. Amás, l'especial pol derbi va comenzar a les 16 hores, cola participación d'ex futbolistes, aficionaos, peñistes que van ver el partíu dende fuera d'Asturies y otres sorpreses, espaciu dirixíu por Bea Otero onde va entemecese la llingua asturiana y el castellanu.

Tol papel escosáu

Les ganes por disfrutar d'otru duelu de rivalidá faen que yá nun haya entraes pa presenciar el derbi nel Tartiere. Los socios del Uviéu escosaron toles entraes d'acompañante puestes a la venta por 40 euros, mientres que'l Sporting tien abiertu un procesu de pidimientu d'entraes pa sortiar les 1.200 destinaes a la afición visitante –300 d'elles guárdales el club xixonés pa supuestos compromisos– con una demanda mui superior, yá qu'a les 3 hores d'abrise yá se superaben les 2.000 inscripciones.

Los d'Anquela, tercer clasificaos, lleguen en racha a esti partíu énte un Sporting asitiáu na novena plaza que dende la llegada de Baraja ta mostrándose mui fuerte en casa, pero que nun sabe lo que ye puntuar fuera, con dos derrotes en Granada (2-1) y Lugo (3-1). El partíu de la primer vuelta finó con empate a un gol tres igualar Toché nel tramu final el tantu inicial de Carmona.

Na semeya, un momentu del partíu de la primer vuelta n'El Molinón.

 

Contador Estadistiques