Losa sigue como delegada del Gobiernu estatal

El Conseyu de Ministros decidió facer cambios n'ocho autonomíes. El presidente asturianu Barbón amosó la so satisfaición pola continuidá de la secretaria xeneral del PSOE n'Uviéu.

Delia Losa, al frente de la Delegación del Gobiernu estatal n'Asturies dende'l 2018, caltiénse nel cargu. "Ye un honor pa min siguir representando al Gobiernu d'España en n'Asturies. Inmensamente agradecida al presidente Pedro Sánchez Castejón pola so confianza. Siguiremos trabayando por esti proyeutu ilusionante, por y pa los asturianos y asturianes", espresaba ayeri llueu de facese públiques les modificaciones.

"Cuenta con tol apoyu de la Executiva Federal, de la Executiva Autonómica y el míu personal. Muyer lleal, de convicciones y bona amiga. ¡Norabona!", diríxiase a ella na rede social X Adrián Barbón.

Los cambios aprobaos ayeri en Conseyu de Ministros sí afeutaron a Cantabria, onde pasa a ocupar el cargu Eugenia Gómez de Diego; Murcia, con María Dolores Guevara; Castilla-La Mancha, con Milagros Tolón; Navarra, con Alicia Echeverria; Estremaúra, con José Luis Quintana; Illes Balears, con Alfonso Luis Rodríguez Badal; Castilla y Lleón, con Nicanor Jorge Sen; y Ceuta, con Cristina Pérez Valero.