Delia Losa sustituirá a Marín na Delegación del Gobiernu estatal

El popular tuvo malpenes dos meses nel cargu tres la dimisión de De Lorenzo.

El cambiu del Executivu estatal tres trunfar la moción de censura de Pedro Sánchez provoca, como ye lóxico, un nomamientu nuevo na Delegación del Gobiernu estatal n'Asturies. El cargu ocuparálu, a falta de la confirmación mañana del Conseyu de Ministros, Delia Losa, que sustitúi a Mariano Marín, designáu'l pasáu 23 de marzu.

Militante de l'Agrupación Municipal Socialista d'Uviéu, foi vocera de la plataforma asturiana de sofitu a Pedro Sánchez nes primaries nos que l'actual presidente del Estáu s'enfrentó a l'andaluza Susana Díaz. Fía del ex alcalde de Mieres Gustavo Losa, ye responsable de la secretaría de Política Institucional del PSOE uvieín.

Otra manera, María Luis Carcedo va dirixir l'Altu Comisionáu contra la Probeza Infantil, que depende direutamente de Presidencia. La de Samartín sonó pa ser una de les ministres del equipu de Gobiernu nuevu de Sánchez.

Na semeya, Losa –na parte superior derecha de la imaxe– xunto con compañeres de l'Agrupación Municipal Socialista d'Uviéu.