Los xulgaos emiten resoluciones contradictories nel casu de Xurde Blanco

El lletráu Xurde Blanco Puente, protagonista d'un enfrentamientu llegal cola alministración asturiana pol derechu a espresase n'asturianu nes sos comunicaciones coles instituciones, dio anuncia ayeri de la emisión dende los dos xulgaos de lo Contencioso-Alministrativu d'Uviéu onde se trataben les sos demandes, de dos resoluciones que se contradicen. Les sales 3 y 5 de los xulgaos teníen que decidir sobre dos demandes presentaes pol lletrau bien asemeyaes, la primera por negar l'alministración un escritu de Blanco pidiendo un permisu por baxa médica escritu n'asturianu y la otra por un permisu por vacaciones. En dambos casos, el lletráu pidía l'aplicación del artículu 4.2 de la llei 1/1998, d'usu del asturianu que reconoz el derechu de los ciudadanos a usar l'asturianu cola alministración, una llectura que nun se comparte dende la mesma alministración, qu'entiende que l'artículu nun reconoz esi derechu a los mesmos funcionarios.



Ello ye que'l Xulgáu númberu 3 emitió un autu en qu'afita que na llei 1/1998, d'usu del asturianu, la pallabra "comunicaciones" resulta "omnicomprensiva de tolos actos del particular" mientres que cola espresión "col Principáu d'Asturies" "alúdese a la entidá territorial "Principáu d'Asturies" y non a la "Alministración del Principáu d'Asturies", de forma que'l preceptu "espurre la so voluntá a la mesma alministración" reconociendo polo tanto'l derechu de Blanco Puente, anque ello quedaría pendiente del recursu presentáu dende esta sala al Tribunal Supremu sobre la constitucionalidá del artículu 4.

En contra d'ello, el Xulgáu númberu 5, qu'emitió sentencia sobre'l casu, diz que l'aplicación de la Llei 1/1998 nun s'estiende a tolos actos del particular dientro del procedimientu alministrativu, sinon a "les comunicaciones orales o escrites nun marcu más restrinxíu que'l que supón la tramitación d'un procedimientu d'esta naturaleza" y "non nel ámbitu de toles Alministraciones existentes y sólo nel de l'Alministración autonómica".



Asina, mientres el Xugáu númberu 3 caltién que "casu de considerase constitucional l'artículu 4, el fallu sedría estimatoriu de la pretensión del recurrente", el Xulgáu númberu 5, nun pon en dubia la constitucionalidá del artículu 4, pero desestima les pretensiones del recurrente porque onde la Llei diz "tolos ciudadanos" la xueza interpreta, según esplica Xurde Blanco "qu'hai qu'estremar ente ciudadanos funcionarios y ciudadanos non funcionarios" polo que "discrimina y torga al funcionariu l'emplegu de la so llingua porque calletra que nun tienen na llei -que na nun diz d'ello- el mesmu tratu les "comunicaciones ad extra" que las "comunicaciones ad intra"

Xurde Blanco recuerda qu'hai menos d'un añu, "el Tribunal Superior de Xusticia d'Asturies estremaba en sentencia de 22 d'avientu de 2006 ente usu académicu y usu burocráticu de la llingua, almitiendo pal segundu les comunicaciones n'asturianu, orales o escrites, de los ciudadanos cola Alministración y refugándolu pa les académiques" sorrayando como "nos casos xulgaos les comunicaciones son burocrátiques dafechu, al tratase de solicitú de vacaciones y de permisos por asuntos propios".



Xurde Blanco saca en conclusión que "seyan les comunicaciones burocrátiques o académiques; "ad extra" o "ad intra"; omnicomprensives o restrinxíes; fáiganse énte l'Alministración Territorial o l' Autonómica o al amparu de lleis que-y abulten al xuez constitucionales o inconstitucionales; puestes les coses p'arriba o p'abaxo, da lo mesmo, el resultáu énte los Xulgaos y Tribunales d'Asturies nun camuda: ñégase l'exerciciu de los drechos llingüísticos de los asturianos" y ello asina porque "y neso toos tan d'alcuerdu" recuerda Blanco, "la llingua asturiana nun ye oficial".

El lletráu tamién tien claro a la vista de les sentencies que ye preciso "llevar el conflictu llingüísticu fuera de los tribunales y xulgaos asitiaos n'Asturies" alvirtiendo que va llevar el casu "al Tribunal Constitucional, de mano, y al Europeu de los Derechos humanos, llegáu'l casu" anque estima con pesimismu que "cuando los Tribunales Constitucional o Européu de los Drechos Humanos respuendan, dientro de 15 o 20 años, la llingua asturiana tará, de xuru, sociolóxicamente muerta". La ironía rescampla pa Xurde Blanco nel fechu de que pa entós "ye posible que l'asturianu gocie d'una bayura d'obres lliteraries subvencionaes pol mesmu gobiernu llingüicida".