Los votos de Foro y PP torguen la reprobación de Suárez por negar la esistencia del asturianu

La proposición pa la reprobación del conceyal presidente de Divertia, Óliver Suárez Rubio, presentada por Convocatoria por Xixón en Plenu tuvo la oposición de Foro y PP, mentes que VOX astúvose. L’ex edil d’esti partíu refiríerase nuna entrevista al asturianu como “una llingua que nun esiste” y falara d'una supuesta “falta d’ufierta” pa xustificar una reducción d'actuaciones nesti idioma na programación.

Los 14 votos que sumen los dos partíos de gobiernu y el conceyal non adscritu torgaron una propuesta que sí contó col sofitu de PSOE y Podemos. La coalición formada por Izquierda Xunida (IX), Más País y Izquierda Asturiana (IAS) convidó a Xosé Antón Fernández ‘Ambás’, en representación de l’asociación Grana, n’Alcordanza de Yolanda Huergo, y como firmante del manifiestu ‘Música n’asturianu sí’, pa defender la reprobación y pa falar de la importancia del patrimoniu llingüísticu asturianu.

“Venimos, otra vez, a dar respuesta a gravísimes declaraciones qu’amuesen intención de vulnerar derechos culturales, sociales y llaborales”, arrancó Ambás, qu’apuntó que “cuando Suárez diz qu’entiende ‘qu’hai falta d’ufierta’ d’espectáculos n’asturianu, ta amosando una inorancia tremenda nel área que xestiona”. Asina treslladó al Plenu que “el catálogu de ‘Asturies, Cultura en Rede’ tien 159 espectáculos d’artes escénices y musicales que s’interpreten dafechu en llingua asturiana” y que la industria musical n’asturianu cuenta con “más de 500 referencies y más 7 millones de reproducciones anuales que vienen de más de 70 países distintos” en plataformes dixitales”.

El músicu afirmó, enantes de contar una historia personal, que “nun tamos equí por caprichu. Pero lo que sí que tenemos mui claro ye que s’acabó siguir tolerando el más mínimu ataque a la llingua asturiana y a la industria cultural qu’esiste alredor d’ella. Nesti sentíu nun entendemos por qué cuando se quier meter mano retrógrada nel FICX, l’alcaldesa de la ciudá diz ‘se acabó’ y actúa en consecuencia, pero nun pasa nada cuando desprecien a la creación cultural n’asturianu y a la llingua asturiana ¿Acaso la cultura d’esti pueblu ye menos que cualquier otru sector o derechu?”.

“Nun intenten xustificar lo inxustificable”

Nes intervenciones, Noelia Ordieres, de Convocatoria por Xixón, pidió al equipu de gobiernu que “nun intenten xustificar lo inxustificable. Lo único que tienen que facer nesti Plenu ye facer dos coses mui cencielles: una ye pidir disculpes por confiar la cultura y los eventos d’esta ciudá a una persona con ideoloxía ultra que niega la realidá de miles de persones, y dos revocar el so nomamientu y devolver la dignidá a una institución tan importante como ye Divertia”.

Pela so parte, Suárez Rubio, calificó de “mentira” la proposición poles sos declaraciones, que díes más tarde trató de matizar en RPA, y dixo que’l motivu real que ta tres d’ella ye’l so apoyu al gobiernu de Foro y PP pa dar estabilidá al mesmu. Darréu declaróse un defensor de la cultura d’Asturies y la tradición.

“Voi falar agora nun idioma que nun esiste según el presidente que vusté punxo na empresa muncipal Divertia”, arrancó Olaya Suárez Fernández, de Podemos, que siguió afirmando que “nun creo que la xente que metió la papeleta de Foro nes eleiciones del 28 de mayu lo ficiere con gana de que les polítiques municipales dependieran del votu d’un estremista, nin que lo ficiere pa poner bona parte de la cultura y los festexos de la ciudá en manes d’un inorante redomáu, d’un inorante de los peores, que son los que tán arguyosos de que rescample la so inorancia y el so odiu”. Recordó-y depués a Carmen Moriyón que “va dos meses anunciar una intervención política nel FICX yera l’acabóse y agora l’otru diz lo mesmo y nun pasa nada”.

“Lo que tamos viendo ye una involución pa Xixón y tamién pa vusté y el so partíu, alcaldesa. Sin nin siquier desautorizó al presidente de Divertia por estes declaraciones acientífiques y antiasturianes, ¿qué dignidá insitucional nos queda? ¿Qué respetu tien esti gobiernu pola llingua asturiana? ¿Cómo podemos tar tranquiles cuando anuncia cambios nel nuestru Festival de Cine? ¿Qué podemos esperar de la programación cultural y festiva que pagamos toles xixoneses si les xestionar esti bárbaru?”, entrugóse.

El PP nun intervieno

La única representante de VOX, llueu de la marcha de Suárez Rubio, Sara Concepción Álvarez Rouco, criticó la proposición, pero nun perdió la oportunidá de referise a él como un “tránsfuga”. Per parte socialista, Luis Manuel Flórez ‘Floro’, tamién se refirió col mesmu términu al edil non adscritu y apuntó que coles sos pallabres sobre l’asturianu cárgase la promoción del idioma.

El PP decidió nun intervenir nel alderique, mentes que por Foro faló Jesús Martínez Salvador, que dixo tar deceicionáu polo qu’entiende una intención de la izquierda d’apropiase de la cultura asturiana y defendió’l llabor de Suárez. Al tiempu negó cualquier tipu de vetu al asturianu.

Ordieres respondió al voceru del partíu que tien l’Alcaldía y conceyal d’Urbanismu, del que depende agora Festexos, afirmando que “la diferencia ente usté y yo ye qu’usté ta equí xustificando lo inxustificable, calteniendo la equidistancia, como nun pue ser d’otra manera, y abrazándose a un ultra pa caltener la mayoría d’un gobiernu, y yo, señor Martínez Salvador, antes de xustificar lo inxustificable, caltener la equidistancia y abrazame a un ultra pa caltener un gobiernu, prefiero primero de too, caltener la mi dignidá y la de los míos”. Enantes, dirixérase a Suárez Rubio apuntando que pensara que “yera mudu, como nunca tien nada qu’aportar a los debates... Agora tamién-y digo, que pa escuchar babayaes, prefiero nun escuchalu”.

Na imaxe, los ediles abandonen el salón de plenos, con Martínez Salvador en primer planu y Ordieres al fondu de la imaxe.