Califiquen de "decepcionante" el conteníu de les intervenciones contraries a reprobar a Suárez

La plataforma 'Música n'asturianu sí' llamenta tamién el resultáu de la votación.

"Decepcionante". Asina califiquen los sos promotores el conteníu de les intervenciones de los conceyales nel Plenu de Xixón d'ayeri contrarios a reprobar al edil presidente de Divertia, Óliver Suárez Rubio, poles declaraciones nos que negaba la esistencia del asturianu y dexaba cayer una supuesta falta d'ufierta d'actividaes nesti idioma, esto ye Foro, VOX y el propiu Suárez Rubio –el PP votó en contra pero nun intervieno nel alderique–.

Sopréndense dende 'Música n'asturianu sí', convidaos a intervenir por Convocatoria por Xixón, que presentó la proposición de reprobación, porque "llegaron a falar de cuestiones de política madrileña que nada tienen que ver con Asturies nin cola cultura asturiana", y llamenten el resultáu final de la votación, na que namái PSOE y Podemos apoyaron a la coalición, con VOX na astención. Sicasí, siéntense satisfechos por contribuyir a retrucar con argumentos sólidos, presentaos por Xosé Antón Fernández 'Ambás', a unes declaraciones que, aseguren, "nun pueden permitise más".

Na semeya, los ediles sienten la intervención d'Ambás, con Suárez Rubio asitiáu a la izquierda de la imaxe.