Los viaxes d'estudiantes tán detrás del aumentu repentín de contaxos: 165 nuevos esti miércoles

El conseyeru Pablo Ignacio Fernández Muñiz venceyó l'aumentu a dos desplazamientos a llugares turísticos del sur peninsular.

"Nun se pueden prohibir los viaxes, pero debemos facer un llamamientu a la responsabilidá, non sólo de los xóvenes, sinón tamién de les sos families", espresó ayeri'l responsable de Salú depués de participar nel Conseyu Interterritorial del Sistema Nacional de Salud, celebráu de manera presencial nel Senáu. Si na xornada foron 140 los contaxos comunicaos, de los que 93 pertenecieron a menores de 30 años, según confirmó a lo llargo de la tarde la conseyería, güei informaba de 165 casos nuevos de COVID-19 –l'actualización de los datos oficiales dexó la cifra final en 167 por duplicaos en díes previos–.

Ye la cantidá más alta de positivos dende'l 13 d'abril, cuando se rexistraron 190 –la cantidá final vien d'una revisión de datos, yá que naquella fecha la cifra comunicada foi 194–, y fraya la tendencia que se taba viendo dende'l final del estáu d'alarma, cola curva nuna situación de meseta. Esti aumentu venceyólu ayeri Fernández Muñiz a "dos viaxes d'estudiantes a dos poblaciones turístiques del sur de la Península", anque la ministra de Sanidá, Carolina Darias, tamién incluyía a Asturies na llista de doce territorios afeutaos pol polémicu biltu de Mallorca.

Tasa de positividá diaria del 7,68 por cientu

El Serviciu de Salú del Principáu d'Asturies (SESPA) fixo 2.265 pruebes de de diagnósticu d'infeición activa, polo que la tasa de positividá diaria pasó del 6,64 por cientu al 7,68. A 7 díes esti porcentaxe taba'l martes nel 4,29 por cientu –ayeri xubió al 5,22 por cientu–. 

Nun hebo que llamentar muerte nenguna, polo que'l total de persones finaes nel andanciu pola enfermedá causada pol coronavirus SARS-CoV-2 sigue en 1.980. Caltiénense ingresaos na UCI 11 persones, mentes qu'en planta tán hospitalizaes 37 persones con confirmación o sospecha de COVID-19, 2 más que'l martes.

16 biltos activos

Asturies informó a Sanidá de la esistencia de 16 biltos activos, 5 más que la selmana pasada, con un total de 196 casos. 8 d'ellos detectáronse estos 7 díes últimos, comunica la conseyería.

Na semeya, Fernández Muñiz ente la representante de La Rioja, Sara Alba, y el de Galicia, Julio García Comesaña.