Aumentu importante de los contaxos: 140 rexistraos esti martes

Dos terceres partes de los positivos detectaos correspuenden a menores de 30 años.

La Conseyería de Salú, a falta de la espublización de los datos oficiales de la COVID-19, comunicó 140 casos nuevos correspondientes a ayeri –una revisión de los datos aumenta el total de la serie en 11 hasta los 54.091 positivos–. Ye la cantidá más alta dende'l 20 d'abril, cuando hebo 142 tres una revisión de los datos –nun primer momentu informóse de 144–, y triplica la cantidá media diaria que se vien rexistrando dende'l final del estáu d'alarma.

Miguel Ángel Prieto, xefe d'Alertes y Emerxencies Sanitaries COVID-19, aseguró, magar esti datu, que "podemos siguir considerando la situación de la pandemia n'Asturies baxo control". Apuntó que "dos terceres partes" de los contaxos "prodúcense en persones menores de 30 años" por una mayor interacción social nestos grupos d'edá, llamando a cumplir les midíes de proteición contra'l coronavirus SARS-CoV-2 y a non banalizar los síntomes de sospecha d'infeición.

El Serviciu de Salú del Principáu d'Asturies (SESPA) fixo'l martes 2.348 pruebes de de diagnósticu d'infeición activa, polo que la tasa de positividad s'asitió nel 6,64, pol 3,56 por cientu comunicáu ayeri, cuando s'informó de 66 casos nuevos de COVID-19. A 7 díes esti porcentaxe yera'l domingu del 3,43 por cientu, xubiendo'l llunes al 3,75 por cientu –ayeri taba yá nel 4,29 por cientu–.

Hebo que llamenta la muerte d'una persona, una muyer de 47 años, depués de que s'acumularen cuatro xornaes ensin finaos. Ye la númberu 1.980 del andanciu.

Mentes, tán hospitalizaos 35 pacientes con confirmación o sospecha de COVID-19, a los qu'hai que sumar otros 11 ingresaos na UCI. Son 8 y 2 menos que'l llunes, de manera respeutiva.

Na imaxe, Prieto nuna rueda de prensa celebrada'l día 10.