Los vecinos del Valledor reciben a Os Reises

Os Reises de Tormaleo, mentes, anuncien qu'esti añu nun van salir a pidir l'aguilandu.

Tres los Aguilandeiros de San Xuan de Villapañada y el Guirria de Ponga, llega'l turnu a la mazcarada d'iviernu viva d'Allande. Os Reises del Valledor salen mañana de Villalaín a les 10.30 hores p'animar a los vecinos del llugar.

El percorríu de la comparsa, recuperada hai 11 años, va siguir hacia San Salvador, pa finar en Fonteta. Ehí va siguir la folixa con una xanta popular a partir de les 15 hores.

Os Reises del Valledor van entregar nesta ocasión el 'Choqueiro de Os Reises' a Jaime Izquierdo "pol so grandísimu llabor en favor de la sobrevivencia de l'aldea". Amás, entama'l cuartu concursu de fotografía de la mazcarada, con premios de 200 y 100 euros a les dos meyores semeyes de la folixa.

Descansu n'Ibias

La otra comparsa que sal nestes feches, Os Reises de Tormaleo, nun van salir esti añu. Sicasí, la mazcarada anuncia que se trata d'un descansu pa tornar l'añu qu'entra con más fuercia.