Los trés zarraos na Catedral, en fuelga de fame indefinida

Deciden dar un pasu más na so protesta énte la postura que sigue calteniendo Vesuvius.

Na mañana d'ayeri los trés trabayadores que permanecen zarraos na catedral d'Uviéu dende'l miércoles comenzaron una fuelga de fame indefinida. La so intención ye la de siguir hasta que se solucione un conflictu que podría dexar na cai a los 111 emplegaos de la multinacional británica en Llangréu y a los 17 de Miranda de Ebro.

Güei, n'asamblea, la plantiya va decidir qué fai cola propuesta dada ayeri pola empresa, cuando finalizaba'l plazu de negociación del ERE. Otra manera, a les 19 hores ta convocada una concentración nueva na plaza de la Catedral pa sofitar a los zarraos nel templu.