Los trabayadores de Vesuvius acepten la propuesta de la empresa: cese d’actividá y compromisu de reindustrialización

El 99 por cientu de los trabayadores de Vesuvius aceptó n’asamblea la propuesta cabera presentada pola multinacional. Les plantes de Llangréu y Miranda de Ebro cesen la so actividá, calteniendo a 19 emplegaos comerciales n’Asturies, y la empresa comprométese a participar nun procesu de reindustrialización coles alministraciones.

“Esta decisión, que foi complicada y na que nun favoreció pa nada l’actitú de la empresa mientres tol procesu, vien dada tres nun optar Vesuvius por ampliar el periodu de consultes y realizar una propuesta finalista, a les 3 de la madrugada”, apunten dende Comisiones Obreres (CC OO) d’Industria d’Asturies. Les condiciones, más favoratibles pa los trabayadores a les que marca la llexislación, y el compromisu a desarrollar un plan de reindustrialización que permita xenerar la mayor cantidá de puestos de trabayu llevó a esta decisión casi unánime.

A pesar del zarru, qu’afeuta a 111 asturianos y 17 castellanos, a esceición de 19 que van siguir nes oficines comerciales de Llangréu, nun van cesar les movilizaciones. Dende yá esixen a l’Alministración central que convoque la Mesa de Trabayu pa la Reindustrialización y “se conviertan en realidá toos esos compromisos fechos mientres el conflictu por parte de los responsables del Ministeriu d’Industria y de les conseyeríes d’Industria” d’Asturies y Castilla y Lleón.

Los trés trabayadores en fuelga de fame abandonáronla ayeri, anque siguen col so zarru na catedral d’Uviéu. Nun van dexalu hasta la convocatoria de la mesa de trabayu.