Los trenes de cercaníes y media distancia yá son de baldre y la tarxeta del CTA suma 2.500 usuarios nuevos

Esti xueves, 1 de setiembre, actívense les midíes del Gobiernu estatal y nacional pa favorecer el tresporte públicu y ayudar a les families énte la tendencia inflacionista esistente. Los abonos pa cercaníes de Renfe y Feve, y media distancia pasen a ser de baldre hasta’l 31 d’avientu y el CTA ufre una tarifa plana mensual de 30 euros de nome 'ConeCTA'.

La receición de les midíes ente los usuarios foi mui positiva, como amuesa l’altu volume de viaxeros esistentes güei nes estaciones asturianes. Yera’l primer día nel que s’activaba, con caducidá a fin d’añu nel casu de los trenes, anque l'Executivu español nun descarta prorrogalu.

Pal tresporte ferroviariu l’abonu pasa a ser de baldre p’aquellos usarios que faigan un mínimu de 16 trayeutos nesti periodu de 4 meses. Sicasí, ye necesario primero pagar una fianza de 10 euros nel casu de les cercaníes y de 20 nel de media distancia, que se devolverá cuando fine l’añu si se cumplió esa condición de facer 16 viaxes, procedimientu que yá fixeron 10.000 persones n’Asturies.

Mentes, el Gobiernu asturianu creó una tarifa plana de 30 euros baxo’l nome de ‘ConeCTA’ que permite viaxar per toa Asturies en tolos servicios de tresporte interurbanu per carretera del Consorciu de Tresportes d’Asturies (CTA), nes empreses de tresporte urbanu d’Uviéu, Xixón y Mieres, y de los servicios urbanos prestados por el CTA na zona d’Avilés y na cuenca d’El Nalón, asina como a tolos servicios de cercaníes ferroviaries, tanto de Renfe como de Feve. Esta tarifa nueva supón un descuentu del 86 por cientu sobre’l precio actual del abonu CTA 8 zones, el que permite viaxar per toa Asturies, con un costu mensual qu’ascendía a 216,10 euros.

‘ConeCTA’ llevó al CTA a aumentar el so volume d’usuarios en 2.500 persones, que se sumen a los 48.000 que yá contaben con dalgún de los abonos esistentes. Según los datos rexistrados nos meyores meses enantes de la pandemia, taban en funcionamientu de forma simultánea un máximu de 17.000 abonos mensuales.

De forma paralela aplícase tamién dende güei una mengua del 30 por cientu nos bonos de 10 viaxes del CTA cola primera recarga que se faiga. Hai distribuyíes anguaño más de 200.000 tarxetes de ‘Bono 10’ que se tresforma agora en ‘ConeCTA 10’.

Na semeya, un tren de Feve apuerta a la estación provisional de Xixón.