Los trabayadores de supermercaos caltienen la fuelga convocada

Sigue ensin haber alcuerdu a falta de poques hores pal aniciu de los ochos díes de paru.

Los y les trabayadores de sector minorista de l'Alimentación caltienen el paru que va comenzar a les 22 hores de güei, na cercanía de la Navidá, y que tien marcáu como feches de fuelga'l sábadu, domingu, llunes y martes, y los díes 28, 29, 30 y 31. Anque los sindicatos CC OO, UXT y USO apunten qu'entovía hai tiempu pa parar la convocatoria si la patronal se decide a negociar, lo cierto ye que les postures paecen alloñaes.

La fonte del conflictu ta na negociación del conveniu, al que nun tán venceyaos los emplegaos de Mercadona, Dia o Familia al tener ún propiu, anque sí los 12.000 d'Alimerka, Masymas o El Arco y otros comercios d'alimentación pequeños. La patronal acepta la xuba salaria que propón la patronal, pero hai desalcuerdu no que respeuta a los descansos y l'antigüedá.

Sí hebo alcuerdu nel conflictu de les ITV

L'otru paru que taba anunciáu pa esti avientu, el de los y les trabayores d'ITVASA, empresa de titularidá pública que s'encarga de la inspeición téunica de vehículos, nun se llegó a entamar depués de que s'aplazara del 11 al 17 la primer xornada de fuelga por un defeutu de forma na convocatoria. Dambes partes llegaron el sábadu, día 14, a un alcuerdu énte'l Serviciu Asturianu de Solución Estraxudicial de Conflictos (SASEC) pol que se va recuperar la xornada de 35 hores a lo llargo del añu qu'entra –previsiblemente n'ochobre–, va aumentase la plantía y va amenorgase la temporalidá.

Na semeya, un momentu de la rueda de prensa dada esta mañana polos sindicatos pa informar de la situación.