Los términos del alcuerdu

Asturies.com da, en primicia absoluta, los términos del alcuerdu sobre política llingüística ente Izquierda Xunida - Bloque por Asturies y la Federación Socialista Asturiana.

El documentu apautáu ente dambes fuerces polítiques y al que tuvo accesu esti mediu articúlase alredor de 12 midíes a desarrollar na presente llexislatura. Como yera d'esperar, la oficialidá queda aparcada, pero la declaración de motivos previa al articuláu demuestra un enfotu de ponese nel camín d'ella y diz que "El Gobiernu asturianu va abrir un fonderu analís de la realidá llingüística asturiana en diálogu colos axentes sociales y y les instituciones .... valorando les midíes llegales que puean ser un marcu necesariu pa la normalización social de la llingua".

Les midíes concretes pasen, en primer llugar, pola creación d'una Dirección Xeneral de Planificación y Política Llingüística dientro de la Conseyería d'Educación o bien d'una más xeneral Dirección Xeneral d'Acción Cultural y Política Llingüística, pero esta enxerta na Conseyería de Cultura, que va esgayase de la d'educación pa la presente llexislatura. Ana Rosa Migoya ye'l nome que más suena pa facese cargu d'esta nueva Conseyería de Cultura.

En segundu llugar, el documentu fala de definir y desarrollar un Plan De Normalización Sociollingüísticu d'alcuerdu coles alministraciones públiques y en que se digan los plazos y oxetivos a conseguir.

Otru de los puntos fuertes refierse a la presencia del asturianu nel sistema educativu. Ensin poner propuestes concretes en cuestiones como la plantilla de profesores, l'alcuerdu diz que se pedirá'l "reconocimientu y presencia efectiva de la llingua en tolos niveles educativos", recoyendo les esixencies de la creación de la llicenciatura en Filoloxía Asturiana y creación del Curriculum de Llingua Asturiana.

La igua de la Toponimia Oficial, otra de les reivindicaciones históriques del asturianismu, fadríase al través d'un plan de señalización vial y del echar a andar efectivamente la Xunta de Toponimia, órganu hasta agora ensin actividá real.

El documentu apautáu ente FSA y IX-BPA tamién reconoz el papel de l'actual Llei d'usu del asturianu como ferramienta normalizadora, pidiendo pa ella un desarrollu en forma de reglamentu que faiga d'ella un documentu aplicable a la realidá

Tres d'estos argumentos mayores , el documentu tamién espeya dellos compromisos complementarios ente los que tan l'impulsu a la llingua asturiana nos medios de comunicación, pidiendo qu'esta voluntá se lleve al futuru ente públicu de la RTVA, la revisión de los criterios de Política Editorial garantizando mecanismos tresparentes y oxetivos, l'aplicación de criterios normalizadores pal gallego-asturianu o el que l'alministración garantice l'emplegu de la llingua, cosa a la que se llegaría al través de cursos y convenios de formación.