Los sindicatos llamen a participar na manifestación d'Avilés contra’l zarru d’Alcoa: “tien que ser histórica"

El xueves, a les 19 hores, CC OO, UXT, USO y l’Asociación Profesional de Cuadros convoquen una manifestación n’Avilés col lema ‘Alcoa no se cierra’ na que soliciten una asistencia masiva en sofitu a los trabayadores. “Tien que ser histórica”, coinciden.

La plaza del Vaticano va ser el puntu de salida d’una marcha que va percorrer les cais d’Avilés hasta El Parche pa protestar polos planes de la multinacional estauxunidense del aluminiu, que pretende trancar la so planta avilesina, dexando a 317 persones na cai. Alcoa tamién tien en mente zarrar la so factoría d’A Coruña –dexando activa nel Estáu namái la tamién gallega de San Cibrao–, onde trabayen 369, col argumentu del costu del preciu del costu de la lluz, la vieyura de les instalaciones y la situación del mercáu pola sobreproducción china.   

“Tien que ser histórica”, afalen los sindicatos, que faen un llamamientu a tola sociedá asturiana pa que se manifieste’l xueves xuntos colos trabayadores énte la postura “depredadora” de la empresa. Entienden que ta en xuegu’l futuru d’Asturies, yá que decisiones d’esti tipu de les multinacionales asentaes nel país ponen en peligru la nuesa industria.