Glayíu unánime: “Alcoa nun pieslla”

|
Manifestación Alcoa Avilés

Avilés vivió esti xueves una manifestación histórica con cerca de 50.000 persones na cai pa esixir que se caltengan los 317 puestos de trabayu na factoría d’Alcoa na villa. Tamién tuvieron presentes los emplegaos de la d’A Coruña, que tán viviendo la mesma amenaza de la multinacional estauxunidense del aluminiu.

Los sindicatos convocantes, CC OO, UXT, USO y l’Asociación Profesional de Cuadros, solicitaran el sofitu de la sociedá avilesina y asturiana pa convertir la marcha ente la plaza del Vaticano y El Parche n’histórica y asina foi. Los comercios de la ciudá piesllaron pa sofitar la manifestación y numberoses persones desplazáronse hasta Avilés dende diferentes puntos del país p’acompañar a los trabayadores na so llamada pa evitar el zarru de la factoría nun capítulu más del desaniciu de la industria asturiana.

La cabecera principal de la manifestación llevaba’l lema ‘No al desmantelamiento de la industria. Por el empleo en Alcoa’, a la que siguió una de los trabayadores d’A Coruña –planta que la multinacional tamién pretende trancar dexando na cai a 369 persones–, otra de los de la factoría de San Cibrao –la única que la firma estauxunidense dexaría activa nel Estáu– y, darréu, una tercera en representación d’emplegaos d’otres empreses en llucha. Al final, El Parche quedaría pequeñu p’acoyer a tal cantidá de persones en defensa del futuru d’Asturies.

Dende’l comité d’empresa d’Alcoa Avilés agradecieron con emoción tal enorme sofitu. El 1 d’avientu los 317 emplegaos quedarán na cai, pero les piles pa siguir defendiendo los puestos de trabayu y demandar una solución tán bien cargaes gracies al apoyu de la sociedá asturiana.

Contador Estadistiques