Los responsables del Observatoriu de Política Llingüística reconocen que “falta muncho pal aprobáu”

Ismael González Arias, Ana Vanessa Gutiérrez y Xuan Bello presentaron ayeri n'Uviéu'l balance que del añu 2005 fexo l'Observatoriu de Política Llingüística, entidá privada que funciona "a mou d'asesora de la Oficina de Política Llingüística". L'escritor Xuan Bello declaró a entrugues de los periodistes que l'actuación en materia de política llingüística ta lloñe del aprobáu. Ello ye que l''Observatoriu de Política Llingüística diz na so valoración que'l marcu llexislativu y políticu actual permite facer "avances significativos" na normalización de la llingua asturiana y del gallegu-asturianu anque "dientro de los topes que supón l'ausencia d'oficialidá" y nun contestu en que nun hai "nenguna alternativa política meyor na realidá cotidiana".


L'escritor y voceru del Observatoriu Xuan Bello dixo na presentación del informe qu'había qu'agradecer la collaboración activa de munches instituciones y organismos, sobremanera los ayuntamientos, y "l'actitú constructiva de bona parte del asturianismu". Na cuenta positiva, Bello amestó tamién la xuba de presupuestu de la Oficina de Política Llingüística, el procesu de recuperación y oficialización de la toponimia entamáu pola Xunta de Toponimia y el sofitu a la creación lliteraria, amás del funcionamientu de la rede de servicios de normalización nos conceyos, la xuba de matriculación d'escolinos n'asignatura de llingua o de les subvenciones al asturianu nos medios de comunicación.

Na cuenta de lo , Xuan Bello faló de "la inercia negativa" que suponen delles instancies de l'Alministración "que ponen pilancos nos avances llograos sobre'l papel" y de "la hostilidá de determinaos sectores del asturianismu que se desentienden de los llogros oxetivos y que namás adopten actitúes agresives en contra d'ellos". Nel planu de les realidaes a curtiu plazu, l'Observatoriu atalanta que "nun se ta llogrando que l'asturianu y el gallego-asturianu sía verdaderamente visibles na vida pública y institucional" mientres que no que cinca a la toponimia asocede otru tanto y asina l'Observatoriu apunta que "s'echen en falta" midíes pa reforciar y facer real l'usu de los topónimos oficiales yá revisaos, tanto nes instituciones como nes empreses, al empar que llamenta la "inhibición inesplicable de l'Academia de la Llingua nun trabayu institucional como'l de la toponimia onde ye tan necesaria la so aportación".

Anque s'empondera la xuba de presupuestos en materia de normalización, l'Observatoriu reconoz qu'entovía nun s'algamaron les cifres que s'invirtieron en normalización nel añu 1998, que foi de 2.360.000 euros, y camienta que sedríen precisos un mínimu de 2.900.000. Tamién en rellación con asuntos económicos, l'Observatoriu echa en falta un compromisu más seriu cola Rede de Normalización nos Conceyos y qu'esta se mande per aciu de convenios pa da-y más estabilidá.

Otra de les demandes inmediates tien que ver col tema de los medios de comunicación y concretamente cola Televisión Autonómica, onde l'Observatoriu ve con "esmolición" que la presencia que vaya tener l'asturianu na RTPA sía agora mesmo "una incógnita" polo que ve necesario crear ún órganu d'asesoría llingüística nel que tean l'ALLA, Universidá d'Uviéu, la oficina de Política Llingüística y los profesionales de la prensa.

Fundáu nel pasáu añu 2005 pa facer d'entidá privada que funcione "a mou d'asesora de la Oficina de Política Llingüística" l'Observatoriu fórmenlu "persones representatives social, política y culturalmente, preocupaes pol presente y pol futuru de la llingua asturiana" y tien ente los sos miembros al sociólogu Francisco Llera Ramo, los escritores Xuan Bello, Adolfo Camilo Díaz o Berta Piñán, el presidente del Conseyu de Comunidaes Asturianes Manuel Fernández de la Cera o la diputada d'IX Noemí Martín .