Los redautores del anteproyeutu del Estatutu d'Autonomía, Medaya d'Oru d'Asturies

El reconocimientu a la Comisión de los 8 va llucir na Xunta Xeneral, avanzó Barbón.

El presidente anunció esta mañana en Plenu la decisión del Gobiernu de conceder la Medaya d’Oru, con calter coleutivu, a la conocida como Comisión de los 8, “qu’ellaboró l’anteproyeutu del Estatutu d’Autonomía d’Asturies”, con motivu del 40 aniversariu de la so aprobación. La intención ye que lluza llueu na Xunta Xeneral.

Esta comisión tuvo compuesta por Francisco Sosa Wagner y Bernardo Fernández, pol PSOE; Juan Bautista Fernández Hidalgo y Juan Casero, pola UCD; Ignacio de Otto y Francisco Bastida, pol PCA; y Juan Luis de la Vallina, sustituyíu n’ocasiones por José Luis Martínez López-Muñiz y José Manuel Riesco, pola Coalición Democrática. “Ye un xestu hacia esta Cámara y hacia l’autonomía política d’Asturies”, afirmó Barbón.