El segundu Día d’Asturies en pandemia recupera actividá adulces

L’ameyoramientu de los datos del andanciu de COVID-19, acompañáu del avance de la vacunación, permite esti 8 de setiembre un Día de la Nación Asturiana más asemeyáu al d’años anteriores. Va haber entrega de les medayes d’oru y plata, anque non actividá festiva, y ta convocada una manifestación en Xixón baxo’l lema ‘Asturies, el futuru nes nueses manes’.

Esta tarde, a les 17 hores, va tener llugar el Plenu institucional pol Día d’Asturies na Xunta Xeneral. Yá mañana recupérase l’actu d’entrega de les medayes d’oru y plata del país, nun actu sicasí restrinxíu que va celebrase nel Eurostars Hotel de la Reconquista dende les 18.30 hores.

La Comisión de los 8 que s’encargó de la ellaboración del anteproyeutu del Estatutu d’Autonomía, norma que cumple esti añu 40, va recibir la distinción máxima. Ésta tuvo formada por Francisco Sosa Wagner y Bernardo Fernández, pol PSOE; Juan Bautista Fernández Hidalgo y Juan Casero, pola UCD; Ignacio de Otto y Francisco Bastida, pol PCA; y Juan Luis de la Vallina, sustituyíu n’ocasiones por José Luis Martínez López-Muñiz y José Manuel Riesco, pola Coalición Democrática, de los que finaron De Otto, De la Vallina y Riesco.

Mentes, les medayes de plata van recibiles María Neira, direutora de Salú Pública de la Organización Mundial de la Salú (OMS), y el Club de Guisanderas de Asturias. Adrián Barbón va encargase de presidir esti actu que nun se pudo celebrar l’añu pasáu pola situación sanitaria del momentu.

Por contra, nun va entamase la xornada festiva itinerante qu’acoyía tolos años un conceyu pa torgar grandes concentraciones de xente.

Ensin procesión en Cuadonga

Pol mesmu motivu la Ilesia asturiana nun va entamar la tradicional procesión de la Santina esti 8 de setiembre, nel que se conmemora’l Día de la la Nuesa Señora de Cuadonga. Al meudía sí va celebrase la misa solemne, en condiciones asemeyaes a la del añu pasáu, presidida pol Arzobispu d’Uviéu, Jesús Sanz Montes.

En defensa de los servicios públicos y los derechos llaborales

La manifestación pol Día de la Nación Asturiana va tener esti añu un importante componente social. Asina, baxo’l lema ‘Asturies, el futuru nes nueses manes’ dellos partíos, sindicatos y coleutivos, como Andecha Astur, la Corriente Sindical d’Izquierda (CSI), el Comité d’Asturies pola Amnistía o la Federación Asturiana Memoria y República (FAMYR), ente otros munchos, van salir a la cai nuna marcha con salida a les 12.30 hores de L’Humedal en defensa de los servicios públicos y los derechos llaborales.

Actu de Podemos nel Pueblu d’Asturies

Podemos recupera esti añu la xornada festiva nel Muséu del Pueblu d’Asturies baxo’l nome ‘Revoluciones y utopíes asturianes’, que va principiar a les 11 hores cola mesa redonda ‘Asturies: otros pasaos, otros futuros’, cola presencia d’Enar Areces, creadora de la marca Puru Remangu; Esteban G. Corteguera, militante del movimientu asociativu de Piloña; Silvia García, acordionista de La Bandina’l Fuelle; la historiadora del arte, doctoranda y enfermera Raquel López; y el musicólogu Llorián García. A les 12.30 hores va tener protagonismu la música tradicional, pa siguir con un actu políticu, más actuaciones musicales y una xinta popular.