Los recintos deportivos van tener aforu completu dende'l 4 de marzu

569 positivos detectaos esti martes, xornada na que se contabilizaron 5 muertes.

El Conseyu Interterritorial del Sistema Nacional de Salud votaron esta tarde permitir el 100 por cien d'aforu nos recintos deportivos tanto al aire llibre como cubiertos a partir del 4 de marzu. Dende'l sábadu pasáu taben afitaos nun 85 y un 75 por cientu.

"Toles comunidaes autónomes punxímonos d'alcuerdu na propuesta que fixo la ministra", resumió Pablo Ignacio Fernández Muñiz, conseyeru de Salú. Sicasí, les midíes de seguranza como l'usu de la mázcara o la prohibición de comer y beber van siguir vixentes nes categoríes profesionales.

Sigue baxando'l númberu d'hospitalizaos

La conseyería informó de la detección de 569 casos nuevos de COVID-19 ayeri. Ye una cifra asemeyada a la de los trés díes últimos, al rodiu del mediu millar de contaxos.

El númberu de hospitalizaos baxó de 306 a 287. D'ellos 262 tán planta y 25 na UCI, 17 y 2 menos que'l día anterior.

Na xornada finaron un total de 5 persones, 4 muyeres de 95, 84, 82 y 81 años, y 1 home de 65. El total de muertos aumenta, llueu d'una revisión fecha por Salú, a 2.420, yá que na actualización anterior, el domingu, los datos oficiales marcaben 2.375 y na última, correspondiente a ayeri, xubíen a 2.415 magar la comunicación d'una única perda humana cola enfermedá causada pol coronavirus SARS-COV-2.

Na semeya, Fernández Muñiz participa nel Conseyu Interterritorial telemáticu.