Los Presupuestos salen alantre col votu de 32 de los 45 diputaos

Les enmiendes parciales de Podemos y el PP a les cuentes nun algamaron apoyos.

Asturies yá tien Presupuestos esti 2021, que van entrar a valir el vienres. El Gobiernu algamó un apoyu mayoritariu pola situación esceicional por mor de la pandemia, con la oposición única del PP y de Pedro Leal, diputáu de Foro críticu cola direición actual del partíu.

32 de los 45 parllamentarios votaron a favor de les cuentes, esto ye, los socialistes, los d'Asturies pela Izquierda (Izquierda Xunida-IAS), Adrián Pumares de Foro, los de Ciudadanos y los de Podemos, anque la formación morada presentara 72 enmiendes parciales, trés d'elles pa modificar partíes dientro del apartáu de promoción del asturianu, al considerar "incompletu" el Presupuestu. Tampoco nun salieron alantre les 89 del PP, votaes tamién de manera individual.

Pela so parte, VOX, que venía de rexistrar una enmienda a la totalidá pa la sesión del Plenu de la Xunta Xeneral anterior, optó pola astención.

Na semeya, momentu de la votación del Presupuestu.