Los presupuestos del PSOE n'Avilés salen alantre gracies a un error del PP na votación

|

Tres refugar les cuentes nun primer momentu, trés votos a favor de l'alcaldesa nuna cuestión de confianza venceyada a los presupuestos da'l preste a éstos.

Esta situación fai entá más grande la división interna nel Partido Popular (PP) avilesín. Tres la movida xunta llocal del martes, na que s'aprobó l'astención cola ausencia de dos ediles contarios a esta postura, nun se supo hasta'l momentu últimu la postura definitiva qu'adoptaríen los populares nel Plenu d'ayeri.

Finalmente, cola ausencia na votación de los presupuestos de los partidarios de l'astención, dos por motivos personales –el dia anterior morriera la muyer de Constantino Álvarez García y Francisco José Zarracina alegó una baxa médica– y el terceru, Alfonso Araujo, decidió salir minutos enantes pa nun "contribuyir más al circu", el votu en contra del voceru Carlos Rodríguez de la Torre y Ana María Bretón y Reyes Fernández Hurlé, frayando asina'l mandáu de la xunta llocal, frenó nun primer momentu'l presupuestu del equipu de gobiernu socialista xunto cola negativa a los mesmos de Somos Avilés, Izquierda Xunida y Ganemos Avilés.

Poco depues la situación daría la vuelta cola convocatoria d'un Plenu estraordinariu por parte de l'alcaldesa Mariví Monteserín y la presentación d'una cuestión de confianza venceyada al presupuestu. Ésta foi avalada polos trés ediles populares presentes nesi momentu na sala –Rodríguez de la Torre y Bretón, que votaren previamente 'non', y l'ausente nesi momentu Araujo–, dalgo que depués señalaron que foi "por error", lo que daba lluz verde a les cuentes y frenaba que la oposición pudiera presentar un candidatu con un presupuestu alternativu nel plazu d'un mes.

El restu de formaciones votaren en contra de la cuestión de confianza, a esceición de Ciudadanos, que s'astuvo, polo que Monteserín recibió 11 apoyos por 8 de refugu, aprobándose asina les cuentes socialistes, cercanes a los 72 millones d'euros. Darréu, yá fuera, siguieron les crítiques y acusaciones ente los ediles populares de dambos bandos amosando la división que vive la formación n'Avilés.

 

Contador Estadistiques