Los positivos yá nun lleguen al millar

El Conseyu de Ministros aprueba'l Real Decretu qu'elimina la obligatoriedá d'usar mázcares nel esterior, midida qu'entra a valir el xueves.

Per tercer xornada siguida Asturies rexistra menos de 1.000 casos de COVID-19. Si'l sábadu hebo 819 contaxos –818 llueu d'una revisión– y el domingu 498, ayeri detectáronse 837.

Desciende tamién el númberu d'hospitalizaos, pasando de 373 a 351. D'ellos 321 tán en planta y 30 na UCI, 21 y 1 menos que'l día anterior, de manera respeutiva.

Hebo que llamentar la muerte de 4 persones na xornada, 2 homes de 97 y 91 años y 2 muyeres de 87 y 71. No que va d'andanciu perdieron la vida 2.355 persones cola enfermedá causada pol coronavirus SARS-COV-2.

Dende'l 24 d'avientu

El Gobiernu estatal eliminó esta mañana la obligatoriedá del usu de mázcares en llugares d'esterior impuesta'l 24 d'avientu, anque nun va ser hasta'l el xueves cuando se va retirar esta restricción. Sí que se van esixir n'espacios zarraos d'usu públicu o abiertos al públicu, asina como nos medios de tresporte públicu, y nos eventos multitudinarios que tengan llugar al aire llibre nos que nun se pueda caltener una distancia de, polo menos, 1,5 metros ente persones.

Na imaxe, Isabel Rodríguez García, ministra de Política Territorial y vocera del Executivu estatal, da cuenta de los alcuerdos del Conseyu de Gobiernu. Semeya de Pool Moncloa/Borja Puig de la Bellacasa.