L'ameyoramientu de los datos asitia al país en riesgu mediu por COVID-19

Esti miércoles rexistráronse 1.022 casos y 3 finaes. El BOE espubliza'l Real Decretu qu'elimina la obligatoriedá del usu de mázcara n'espacios d'esterior dende'l xueves.

Llueu de dos meses en riesgu altu por COVID-19, esto ye nel nivel 3 de 4 qu'afita'l Ministeriu de Sanidá, Asturies baxa al riesgu mediu, el 2. L'ameyoramientu de los datos de la pandemia permiten volver al estáu nel que taba'l país dende'l 9 d'avientu.

A falta de la espublización de los datos oficiales del día, el llunes la incidencia acumulada a 14 díes taba en 1.983,44 casos cada 100.000 habitantes, siendo'l récor del andanciu los 4.008,50 rexistraos el 21 de xineru. Un descensu de la curva de contaxos qu'indica'l final d'una quinta fola provocada pola llegada de la variante ómicron del coronavirus SARS-COV-2, muncho más contaxosa que les anteriores.

Llueu de trés xornaes per debaxo de los 1.000 positivos, ayeri la cifra superó otra vegada esta barrera hasta los 1.022. Sicasí, el númberu d'hospitalizaos sigue baxando, pasando de 351 a 331, de los que 302 tán en planta, 19 menos que'l día anterior, y 29 na UCI, 1 menos.

Na xornada finaron 3 muyeres de 95, 93 y 81 años, que ponen el total de muertos nel andanciu en 2.358.

A partir de la medianueche

Dende esta medianueche yá nun va ser obligatorio llevar mázcara n'especios d'esterior. El BOE de güei espublizó'l Real Decretu aprobáu ayeri pol Conseyu de Ministros, especificando que se siguen esixendos en "eventos multitudinarios que tienen llugar n'espacios al aire llibre, cuando los asistentes tean de pie. Si tán sentaos, será obligatoriu cuando nun se pueda caltener una distancia de seguranza de polo menos 1,5 metros ente personas, sacante grupos de convivientes", y n'andenes de tren y estaciones.

Na imaxe, gráficu del Observatoriu de Salú n'Asturies de la incidencia acumulada a 14 díes dende la segunda fola del coronavirus SARS-COV-2.