Los llectores d'Asturies.com ven les feries d'abril que se celebren nel país como un procesu aculturizador

Un 75 por cientu de los nuesos usuarios que participaron en 'Conceyu Abiertu' amosaron la so disconformidá cola celebración de la 'Feria de abril' en villes y chigres asturianos. Venlo como un procesu aculturizador, por un 25 por cientu al que-y presta lo andaluz o nun-y molesta esti tipu de folixes.

La entruga concreta nesta ocasión yera '¿Qué-y paez que se celebre la 'Feria de abril' en delles villes y chigres d'Asturies?'. Un 75 por cientu optó pola respuesta 'Nun me presta un res, yá que lo veo como un procesu aculturizador', mentes qu'un 15 por cientu señaló que "dame igual, como con otres celebraciones foriates que s'entamen como l'Oktoberfest". Por último, un 10 por cientu asegura que "ta bien porque presta comer y beber productos andaluces".

Dende esti momentu yá ye posible participar nun 'Conceyu Abiertu' nuevu. Nesta ocasión queremos conocer, tres la muerte del bomberu Eloy Palacio nel incendiu de la cai Uría d'Uviéu, si los nuesos llectores consideren que los medios de los que disponen estos profesionales son suficientes p'atender emerxencies.