Los llectores d’Asturies.com sofiten l’alternativa defendida por Foro pa los túneles de la variante de Payares

El 60 por cientu de los usuarios d’Asturies.com que participaron en ‘Conceyu Abiertu’ considera más acertao dexar los túneles de Payares pa viaxeros y destinar la vieya infraestructura pa les mercancíes, como decidió’l PP por esixencia de Foro. D’esta forma caltendríase l’actual trazáu, pal que se destinaría 145 millones.

La entruga concreta plantegada la selmana pasada yera ‘¿Considera acertao dexar los túneles de Payares sólo pa pasaxeros y el trazáu actual pa mercancíes?’, a lo qu’un 60 por cientu respondió ‘Sí, porque asina tamién se caltién la vieya infraestructura’, por un 40 por cientu qu’escoyó la opción ‘Non, lo más recomendable ye meter tol tráficu nos túneles’. D’esta forma, los nuesos llectores sofiten l’alternativa escoyida finalmente pol Gobiernu estatal pol so pautu de coalición con Foro, cola instalación definitiva del anchu internacional nes víes de los túneles de la variante, que tien la oposición del Executivu asturianu y del restu de fuercies polítiques al suponer una retrasu nuevu na so apertura.

Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer la opinión de los nuesos usuarios sobre les perres que va recibir Asturies de los Presupuestos Xenerales del Estáu, un total de 211,25 millones d’euros con una mengua del 31,33 por cientu con respeuto al añu pasáu que da continuidá a una cayida continua que comenzó nel 2009, cuando'l dineru destináu al país foi 1.019 millones.