Los llectores d’Asturies.com consideren que Liberbank podría siguir los pasos del Banco Popular

L’ameyoramientu del valor de Liberbank tres la decisión del CNMV de prohibir les ventes en curtiu de los sos títulos nun acaba de convencer a los llectores d’Asturies.com. Un 79 por cientu cree que’l bancu con orixe en CaxAstur pue siguir los pasos del Popular.

La merca d’esti bancu pol Santander pol preciu d’un euru’l pasáu miércoles 7 de xunu al tar al borde de la quiebra creó un efeutu contaxu colos valores de Liberbank, bancu agora más débil del sistema financieru estatal, que llegó a perder un 37 por cientu del so valor nes xornaes siguientes. El llunes 12, la Comisión Nacional del Mercado de Valores (CNMV) prohibía la práutica especulativa de les ventes en curtiu per un periodu d’un mes, midía que provocó una recuperación inmediata del bancu nacíu de la fusión de CaxAstur, Caja de Extremadura y Caja Cantabria.

Aprovechando esta situación, entrugamos nel ‘Conceyu Abiertu’ de la selmana pasada ‘¿Ta Liberbank en problemes?’, a lo qu’un 79 por cientu opinó que sí. Mentes, un 21 por cientu señaló que la situación que vivió’l bancu ‘vien namái por intereses especulativos’.  

Dende esti momentu yá ye posible participar nun ‘Conceyu Abiertu’ nuevu. Nesta ocasión, col branu a les puertes, queremos conocer la opinión de los nuesos llectores sobre la situación actual de les fiestes de prau. Les comisiones de fiestes quéxense pol botellón, los horarios o les denuncies de la SGAE.