Liberbank remonta tres la decisión de la CNMV de prohibir les ventes en curtiu de los sos títulos

El valor de les aiciones de Liberbank medró más d’un 30 por cientu esti llunes depués de perder un 50 por cientu nes dos selmanes últimes, con especial descensu tres la cayida del Banco Popular. La decisión de la CNMV de prohibir les ventes en curtiu de los títulos del bancu con orixe en CaxaAstur ayudó a esta recuperación.

D’esta forma, mientres un mes, la Comisión Nacional del Mercado de Valores (CNMV) impide esta práutica especulativa que consiste en facer cayer el valor de los títulos d’una empresa. Nesta operación, inversores piden ‘prestaos’ per un tiempu les aiciones a los propietarios orixinales a cambiu d’intereses, pa vender los títulos y darréu recompralos a un preciu más baxu, algamando asina un beneficiu.

La frena d’esta práutica permitió a Liberbank recuperar gran parte del so valor en bolsa perdíu, sobre manera, depués de la merca del Banco Popular por parte del Santader pol preciu d’un euru. El mieu a que se pudiera repetir col bancu que tien el so orixe na xunión de CaxAstur, Caja de Extremadura y Caja Cantabria lo asocedíu col Popular provocó esa gran cayida.