Los italianos Uncle Bard & The Dirty Bastards ponen la nota rockera a la Folixa na Primavera

El gallegu Mondra y la Mosquera Celtic Band, dende Toledo, conformen xunto a Llevólu'l Sumiciu les actuaciones principales nel Parque Xovellanos de la celebración mierense.

Col mes d'abril llega la celebración un añu más de la Folixa na Primavera. Esti 2024 cai esta fin de selmana, con inauguración a les 20.30 hores cola llectura del pregón por parte d'Ángeles Nespral, direutora de L'Artusu, grupu que va baillar darréu xunto con Prau Llerón y Ruxidera en compañía de la Banda Gaites Villa de Mieres, y la entrega del Gallardón Fini Suárez, qu'esti añu ye pa l'Asociación Cultural de la Güeria San Xuan- Hogar Xubilaos Returbiu, organizadores del Concursu de Canción Asturiana Cuenca del Caudal, "pol trabayu pa fomentar la creación dende una pequeña entidá de población d’un concursu d’asturianada que tien sonadía en toa Asturies teniendo siempre presente na so esistencia dar puxu a les distintes modalidaes de la canción asturiana y ser quien a avivar cola participación nel concursu d’otres manifestaciones de la música tradicional asturiana".

Van protagonizar la primer nueche de la Folixa na Primavera, Llevólu'l Sumiciu (23.15 hores) y Mondra (00 hores). El gallegu ye una de les sensaciones nueves del país vecín col so amiestu de tradición y soníos contemporáneos.

La sidra ye, xunto a la música, la otra gran protagonista d'esta celebración. Güei la preba va principiar a les 19, con escanciáu hasta les 21 hores y pipes abiertes hasta'l pieslle.

Mañana l'horariu va ser de 13 a 15 con echadores, y de 21 hasta'l fin de fiesta sólo con sidra de tonel. Mentes, el domingu va haber namái pipes disponibles de 13 a 15.

Con raigañu gallegu y irlandés

L'ampliu programa previstu na Folixa na Primavera pal sábadu, qu'inclúi 'La Tarde en Danza' a les 20 hores con Los Gascones, va tener la so primer gran actuación a les 23 hores. Va xubir al escenariu la Mosquera Celtic Band, liderada pol multiinstrumentista toledanu d'ascendencia gallega Fernando Mosquera, que s'arrodia de cinco músicos de nivel.

A les 00.45 va dedicase a mover al públicu Uncle Bard & The Dirty Bastards, banda asentada nel norte d'Italia que fai rock con influencies de la música irlandesa. Como se presenten na so páxina web, "demasiao rock pa los folkies y demasiao folk pa los rockeros".

Na xornada última, el domingu, va haber asturianaes a les 12.30 hores con Manuel Roza Llera, Liliana Castañón, Álvaro Fernández Conde y Cristina Sánchez, acompañaos a la gaita por Iván Rionda, baxo'l títulu de 'Cancios de chigre'. Darréu, a les 13.45 hores, va haber espaciu pal baille col portugués Grupo Folclórico e Cultural de Tardariz.

Pues consultar el programa completu de la Folixa na Primavera calcando nesti enllaz.