Los escoceses Wolfstone tornen a Asturies pa tocar na Folixa na Primavera con Llan de Cubel y Dixebra

L’históricu grupu rock-folk Wolfstone torna a visitar a los sos siguidores asturianos depués d’años, nesta ocasión na Folixa na Primavera de Mieres, cita na que van compartir escenariu’l sábadu con Llan de Cubel y Dixebra. Dende’l vienres al domingu prográmense na villa numberoses actividaes nes que nun falten la sidra y la música tradicional.

Foi en San Mateo, nel 2015, cuando se pudo sentir n’Asturies per última vegada la so propuesta musical, nuna actuación xunto con Nuberu y Hevia na plaza la Catedral nun día marcáu pol agua. Ocho años depués los escoceses van tar en Mieres pa tocar na gran nueche de la Folixa na Primavera, que recupera asina les actuaciones internacionales, a les 23.30 hores, depués de Llan de Cubel (21 hores) y entantes de Dixebra (1 hores), otres dos bandes con gran trayeutoria y reconocimientu dientru de la música de raigaños celtes.

Nun va ser la única oportunidá de presenciar un conciertu de primer nivel en Mieres estos díes, yá qu’esta nueche, tamién nel escenariu instaláu nel parque Xovellanos, mierenses y visitantes van poder ver a Llevólu’l Sumiciu (23.30 hores) y a Algaire (00 hores), que xuega en casa y va presentase con dellos convidaos nuna cita mui especial. La inauguración oficial de la Folixa na Primavera va ser poco enantes, a les 20.30 hores, cola llectura del pregón por parte de Jorge Areces, direutor de l Banda Gaites Villa de Mieres) y la entrega del XXI Distintivu a la Investigación Folclórica Fini Suárez, qu’esti añu va pa la iniciativa Nueche en Danza pol “trabayu realizáu pa sacar alantre esti proyectu que tien el baille y la música tradicional d’Asturies como protagonistes, convirtiéndose nun espaciu d'alcuentru coles nuestres manifestaciones de la cultura asturiana nel centru”.

El programa pa los trés díes ye bien ampliu n’actividaes, con un importante protagonismu de la sidra, que va tar presente en tolos tipos posibles. El Parque Xovellanos ye onde va podre prebase, yá sía echada o en pipa, dependiendo de los horarios.

Trés xornaes de celebración de lo tradicional en Mieres que sirven pa festexar la llegada de la primavera, cola música y la gastronomía como temes centrales. Y tou ello de baldre.