Los horros y paneres centenarios nun han de pagar l'IBI

|

El Conceyu por Otra Función Pública n’Asturies (COFPA) emitió un comunicáu nel que recuerda que, por llei, los horros, paneres y cabazos asturianos tán exentos del pagu d’Impuestu de Bienes Inmuebles (IBI) cuando éstos son centenarios. Los conceyos asturianos pueden cobrar por estos bienes muebles.

Estes edificaciones tradicionales tresportables, nel casu de tener más de cien años, tán incluyíes nel llistáu de bienes de la Llei de Patrimoniu Históricu Español –al igual que los gallegos– que queden exentes del pagu del IBI, “mediando solicitú al respeuto”, según afita la Llei Reguladora de les Faciendes Llocales. Por ello, el COFPA recomienda a los titulares d’horros y paneres centenaries que se dirixan a los conceyos pa pidir una solicitú d’exención del impuestu.

D’igual forma, considera necesario “instar a los Ayuntamientos asturianos pa que declaren d’oficiu la exención del IBI pa los horros y paneres centenaries de los sos conceyos respeutivos porque, perriba del afán recaudatoriu, ta la obligación de les alministraciones llocales de cumplir completamente coles obligaciones de conservación y proteición del patrimoniu cultural asturianu, evitando actuaciones que, como la esixencia illegal del pagu del IBI, pueden ponelu en peligru, propiciando la so destrucción”.

Demanda de Podemos

Podemos lleva los meses últimos promoviendo ensin ésitu la eliminación d’esti tributu a los horros, paneres y cabazos, llevando l’asuntu a la Xunta Xeneral y entamando alcuentros con espertos. Asina, el 14 de payares axuntó a dellos en Candás nuna sesión na que los presentes coincidieron na potencialidá d’estos elementos nel ámbitu educativu, del emplegu y del turismu, asina como na necesidá d’acometer midíes urxentes pa frenar el deterioru aceleráu, cuando non la so perda.

Nesi sen, la idea xeneral caltenida nel alcuentru foi la necesidá d’eliminar l’Impuestu sobre Bienes Inmuebles (IBI) al conxuntu d’estes edificaciones muebles tradicionales.

Contador Estadistiques