Los escolinos que participen en Cantar Presta Muncho celebren los ‘Conciertos de Primavera’

Esti martes arrancaron los ‘Conciertos de Primavera’ de la iniciativa Cantar Presta Muncho qu’entama la Oficina de Normalización Llingüística de Xixón baxo la coordinación de Nacho Fonseca. Nesta edición participen ocho coros infantiles d’otros tantos centros escolares del conceyu, que van axuntar nuna gran gala nel Xovellanos.

El Ramón de Campoamor, La Milagrosa, el Gaspar Melchor de Jovellanos y el Rey Pelayo foron los colexos que presentaron esta mañana nel Centru de Cultura Antiguu Institutu les primeres propuestes de la edición d’esti añu d’un programa yá consolidáu qu’entamó nel 2012 y que namái frenó la pandemia. L’oxetivu ye llevar la música coral a los neños y neñes de Primaria d’una manera cenciella, activa y participativa.

Asina los escolinos trabayen a lo llargo del cursu colos maestros de Música o Llingua Asturiana cantares tradicionales y más modernos, col sofitu de Fonseca, de cara a les actuaciones de final del cursu qu’agora se celebren. El segundu de los ‘Conciertos de Primavera’ va celebrase mañana, a les 10.30 hores nel Atenéu de La Calzada, cola participación de los colexos Santa Olaya, Cabueñes, Laviada y Federico García Lorca, y asistencia abierta pa les families de les neñes y neños.

Los ochos centros van axuntase darréu, el domingu 5 de xunu, nel Teatru Xovellanos nuna xornada de convivencia ente tolos escolinos. Cantar Presta Muncho ye una de les 12 propuestes en llingua asturiana que dende’l Conceyu, dende la Fundación Municipal de Cultura, Educación y Universidá Popular, se presente a los centros pa fomentar l’idioma.

Na semeya, un momentu de l'actuación del coru de La Milagrosa.