244 neñes y neños participaron nel conciertu final del Teatru Xovellanos de Cantar Presta Muncho

El domingu celebróse nel Teatru Xovellanos el conciertu final d’esti cursu de la iniciativa Cantar Presta Muncho qu’entama la Oficina de Normalización Llingüística de Xixón colos colexos del conceyu. Un total de 244 neñes y neños d’ocho centros educativos participaron nesta gala siguida por munchu públicu nes butaques.

Esta xornada de convivencia y celebración punxo’l ramu al trabayu de tol cursu xunto colos maestros de Música o Llingua Asturiana baxo la coordinación de Nacho Fonseca, que nesta ocasión inclusive sustituyó a una profesora que se tuvo qu’ausentar por mor d’un bautizu. Una gran esperiencia pa les escolines y escolinos y tamién de disfrute pa los sos familiares.

Previamente, pa preparar esta cita, entamáronse los nomaos ‘Conciertos de Primavera’ nel Antiguu Institutu y nel Atenéu de La Calzada. Naquella ocasión cada coru interpretó cuatro cantares, que’l domingu reduxéronse a 2.

Éstes foron ‘Chalaneru’ y ‘Nel reinu de Neptuno’, por parte del Ramón de Campoamor; ‘Pericote’ y ‘El coche’l maestru’, del Laviada; ‘Si fuere mozu solteru’ y ‘Que venga Xovellanos’, del Xovellanos; ‘Carretera d’Avilés’ y ‘El mio carillón’, del Rei Pelayo; ‘Na romería de San Andrés’ y ‘Rock del violinista’, del Santa Olaya; ‘Cuando te vi na fonte’ y ‘Blues de les gafes’, del Cabueñes; ‘Tengro tres cabritines’ y ‘Bohemian raposín’, de La Milagrosa; y ‘Cada vez que voi a Llanes’ y ‘Préstame pola vida’, del García Lorca. Pa finar, los cuasi 250 participantes cantaron en comuña, baxo la direición de Fonseca y col acompañamientu del públicu, ‘Fusti al Carmín de La Pola’.

Cantar Presta Muncho ye una iniciativa que tien por oxetivu llevar la música coral a los neños y neñes de Primaria d’una manera cenciella, activa y participativa. Nella deprenden tamién cantares tradicionales y actuales n’asturiau.

Na semeya, actuación final del conciertu con tolos participantes sobre l'escenariu.