Los direutivos de tol mundu del Instituto Cervantes van conocer la creación n'asturianu nel so conceyu n'Asturies

L'alcuerdu ente'l Gobiernu y la institución va permitir l'entamu de cursos de llingua asturiana en centros onde haya matriculaciones.

Cuasi 80 persones, ente responsables de les sedes del Instituto Cervantes repartíos per tol mundu, con presencia en 100 ciudaes de 50 países, y l'equipu direutivu de la institución, tán estos díes n'Asturies pa celebrar la so 'Reunión Anual de Directores'. Un alcuentru nel qu'esponer les necesidaes de caúna d'elles y poner esperiencies en común.

Les sesiones, previstes en Xixón (güei), Avilés (mañana) y Uviéu (miércoles), arrancaron esti meudía con una inauguración nel Teatru de la Llaboral, anque enantes hebo una rueda de prensa cola participación de Luis García Montero, direutor del Instituto Cervantes, y Antón García, direutor xeneral d'Aición Cultural y Normalización Llingüística. Na mesma tratóse la posibilidá, dientro del alcuerdu robláu en marzu pa difundir la llingua y cultura asturianes pel mundu al traviés de les sedes de la institución, de que s'ufran y entamen cursos de llingua asturiana en dalgunos centros nel casu de qu'haya dos o trés matriculaos, como se faen coles llingües oficiales diferentes al castellanu, ensin llegar a los 10 mínimos que s'esixen pa poner les d'español.

Sesión de pieces audiovisuales en llingua asturiana

Los direutores presentes n'Asturies pa una cita prevista pa xunetu que s'aplazó pol adelantu eleutoral van conocer estos trés díes d'alcuentru la creación n'asturianu. Montero anunció una proyeición de pieces audiovisuales en llingua asturiana, amás d'otres actividaes culturales, como actuaciones musicales de Lorena Álvarez y Víctor Manuel.

Na semeya, Luis García Montero y Antón García.