Los contaxos baxen al nivel de setiembre

La selmana pasada rexistráronse 52 casos nuevos de COVID-19 diarios de media.

La baxada de contaxos ye una realidá, hasta asitiase a niveles de setiembre, cuando entamaba la segunda fola. En concreto, nel periodu del 7 al 13 del novenu mes del añu, cuando hebo 365; nos 7 díes últimos, 362.

Entamaba la selmana con 50.920 positivos rexistraos dende l'entamu del andanciu, que finó ayeri con 51.282 –una revisión de los datos fixo qu'aumentara a 51.306–. Son 52 de media diarios, la cantidá más baxa d'una serie qu'evolucionó asina nos ocho meses últimos: 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84 y 52.

Na fin de selmana la Conseyería de Salú comunicó 124 contaxos: 38 el vienres –58 según los datos oficiales pola revisión fecha na xornada–, 49 el sábadu –51 finalmente–y 37 ayeri, con una tasa de positividá diaria del 2,94 por cientu, del 2,54 por cientu y del 2,83 por cientu, de manera respeutiva. A 7 díes el sábadu esti porcentaxe yera del 3,03 por cientu, cuando'l xueves taba nun 3,6 por cientu –ayeri siguió nun 3,03 por cientu–.

5 finaos

Hebo que llamentar 5 finaos esta fin de selmana, cuatro homes y una muyer, 2 el sábadu, cuando se frayó una serie de trés díes ensin perdes, y 3 el domingu. Dende qu'entamó l'andanciu morrieron 1.953 persones cola enfermedá causada pol coronavirus SARS-CoV-2.

129 pacientes tán hospitalizados con confirmación o sospecha de COVID-19, a los qu'hai que sumar otros 41 ingresaos na UCI. Son 6 menos, en dambos casos, en comparanza col xueves.

Na semeya, recintu ferial mierense de Santuyano onde güei ta vacunándose a nacíos nel 1962, mayores de 70 y docentes de la cuenca d'El Caudal.