Los Berrones despide la xira ‘Añu 1 D. C. (Dempués del COVID)’ en Xixón

La xira de los 35 años de Los Berrones, qu’arrancó n’Avilés en xineru del 2022 y llevó a los de Tolivia per dellos puntos del Estáu, va finar el vienres en Xixón. Pa despidir ‘Añu 1 D. C. (Dempués del COVID)’ la banda prepara un conciertu especial na sala Albéniz.

Munches cites especiales tuvieron llugar nestos dos años: actuaciones en fiestes, alcuentros cola emigración y colos munchos siguidores colos que cuenta’l grupu fuera d’Asturies nes paraes de Santiago, Santander, Zamora o Madrid, y la cita especial na xixonesa sablera d’El Natahoyo nel branu del 2022 énte más de 30.000 persones. Una xira esitosa a la qu’esti vienres Los Berrones va poner el ramu dende les 21.30 hores pa centrase en componer pa presentar temes nuevos esti 2024.

Les entraes yá tán a la venta a un preciu de 18 euros que, de quedar disponibles, van tar na puerta a 22 euros. La despidida de ‘Añu 1 D. C. (Dempués del COVID)’ va ser, como la estrena del Niemeyer, especial, cola presencia de dellos convidaos que van convertir l’Albéniz nuna gran folixa de rock n’asturianu.

‘Diccionariu Berrón’

Amás de conciertos, nestos dos años Los Berrones sacaron dellos proyeutos alantre, ente los que rescampla’l ‘Diccionariu Berrón’, con ilustraciones de Neto y testos de David Villa, Aitana Castaño, Alex Galán, Marisa Valle Roso, Pablo Texón, David Castañón y Montse Tomé. Tamién un llote de cerveza artesano conmemorativu, sombreros de paya y camisetes o sudaderes nueves.

Na imaxe, Los Berrones nun conciertu de la xira ‘Añu 1 D. C. (Dempués del COVID)’. Semeya propiedá de Los Berrones.