Los asturianos, dispuestos a facer el petate

L'asturianu ye pueblu dáu y obligáu históricamente a marchar a otros llugares. La tradicional migración a Madrid, ondese fizo clásica la imaxe del serenu de Cangas del Narcea, l'aventura tresatlántica de los indianos, o la migración a Europa nos años 60 del sieglu XX son los antecedentes de la última sangría que ta viviendo'l país, que vive anguaño la marcha d'una xeneración, la que tien agora ente venti y trenta años, énte la falta de perspectives llaborales n'Asturies. El sindicatu CCOO foi el primeru en facer recuentu d'esta emigración, poniendo en 18.000 los asturianos y asturianes que l'añu pasáu marcharon a trabayar fuera de la comunidá autónoma.Afondando na cuestión más allá de los númberos, la Fundación d'Estudios d'Economía Aplicada ta acabante de facer públicu un estudiu en que s'analiza la disposición de la xente en paro a aceptar ufiertes de trabayu fuera de la propia comunidá autónoma. Como viniendo a confirmar los fechos, l'estudiu conclúi que los asturianos tamos ente los más predispuestos a colar a otros llugares con tal d'alcontrar trabayu, superándonos na llista namás que Castiella-La Mancha, y quedando sobre la nuestra altura nesta estadística Cantabria y Estremadura. Como yera de suponer, Madrid y Cataluña, les dos comunidaes de mercáu llaboral más abiertu y economía más fuerte son les comunidaes onde menos xente taría dispuesto a marchar. L'estudiu fai tamién una tabla cronolóxica cola disposición a marchar que se midió nos periodos 87-91, 92-96 y 97-2000, dando p'Asturies la tasa más alta ente los años 92 y 96 y baxando un poco la tasa nel últimu periodu analizáu, anque menos que na media, yá que en cásique toles comunidaes hubo menos disposición a la emigración. Llama l'atención el casu d'Estremadura, onde la disposición a emigrar baxó de cerca del 55% nel 87-91a menos del 30% nel 97-2.000, señal de la meyora d'espectatives de la población. Otru tantu vien a pasar en Castiella-La Mancha, onde la disposición a la movilidá mengua sobre 8 puntos. L'estudiu, que tamién analiza la movilidá laboral por sexos, estáu civil o nivel formativu, pue descargase en formatu pdf dende esta dirección