Los artistes participantes en ‘Bestiariu 3’ lleven al direuto les sos creaciones

Diez díes depués de salir a la venta, los siguidores grandes y pequeños de la serie ‘Bestiariu’ van poder disfrutar en direuto de los cantares del tercer discu d’esti proyeutu. El conciertu va servir pa poner el ramu al V Festival Escenines pa la Reciella.

Losone, Buen Suceso, La Tarrancha, El Koku la Manzana, Nosoträsh, Lorena Álvarez, L-R, Antón Menchacha, Rioturbio, San Jerónimo y Muga y el Corín de Reciella son los grupos que participen en ‘Bestiariu 3’ con temes que traten d’una perra sideral, un cocu que ye’l terror del llagar, un esperteyu o una lleona vasca que conoz a un gatu asturianu. Y ye qu’ésti ye l’espíritu de ‘Bestiariu’: averar l’asturianu al públicu infantil al traviés d’histories protagonizaes por animales y, al empar, iguar nuevos materiales orixinales pa los neños y neñes nesta llingua.

L’apertura de puertes del salón d’actos del xixonés Colexu Públicu Xovellanos ta prevista pa les 11.45 hores de mañana, tando programáu’l conciertu pa les 12 hores. La entrada ye de baldre hasta completar aforu, quedando’l recintu pequeñu nes dos ediciones anteriores.

La xente que s’avere a esti centru escolar, amás de sentir los temes de ‘Bestiariu 3’ interpretaos polos grupos que participen nél, tamién va poder disfrutar de dalgún de los cantares de los dos discos anteriores. ‘Bestiariu’ trátase d’un proyeutu de La Fabriquina qu’edita Araz.net, empresa editora tamién d’Asturies.com.

Teatru esta tarde

El conciertu de presentación de ‘Bestiariu 3’ va servir pa poner el ramu al V Festival Escenines pa la Reciella, entamáu por ‘Reciella. Families pol Asturianu’, que dende’l miércoles vien celebrando actividaes diaries nel salón d’actos Centru de Cultura Antiguu Institutu. Pa esta tarde, a les 19 hores, ta programada la representación de ‘La neña de les trences al revés’, obra d’Iris Díaz Trancho que pon n’escena El Callejón del Gato.