La esperada tercer edición de ‘Bestiariu’ aporta esti miércoles a les tiendes d'Asturies

La primer composición de Nosoträsh depués de dellos años o los primeros temes de composición propia de L-R y Antón Menchaca son dalgunos de los grandes atractivos col que vien la tercer edición de ‘Bestiariu’. Esti discu pa la reciella va ponese a la venta’l miércoles.

Nacíu nel 2015 col oxetivu d’averar l'asturianu al públicu infantil y crear nuevos materiales orixinales pa los neños y neñes nesta llingua, el proyeutu ‘Bestiariu’, un clásicu de les fiestes de Nadal dende hai 3 años, algama la so tercer edición con un discu nel que participen otres once formaciones asturianes de la escena independiente, folk  y rock con cantares orixinales. Losone, Buen Suceso, La Tarrancha, El Koku la Manzana, Nosoträsh, Lorena Álvarez, L-R, Antón Menchaca, Rioturbio, San Jerónimo y Muga y el Corín de Reciella son los convidaos a participar esti añu nel proyeutu, que nos dexa temes sobre una perra sideral, un cocu que ye'l terror del llagar, un esperteyu o una lleona vasca que conoz a un gatu asturianu, ente otres munches histories.

“Tamos mui contentos del resultáu final y esperamos que sía un ésitu, como los otros dos anteriores, que funcionaron mui bien”, apunta David Guardado, promotor d’esta iniciativa xunto a Alicia Álvarez, que destaca que la primer edición ta práuticamente escosada. Guardado rescampla que "otru añu más esti proyectu sal alantre con toles garantíes gracies a tola xente que collabora pero mui especialmente gracies a les bandes qu'aporten el so talentu con unes composiciones perguapes nes que caltienen el so estilu adaptándolu a la temática de los animales y al públicu familiar".

La tercer edición de Bestiariu, que va salir a la venta’l miércoles, amás cuenta con dellos alicientes que tán creando expectación dientro y fuera d’Asturies, como la primer composición tres dellos años ensin axuntase n’estudiu de Nosoträsh, una banda asturiana con una gran repercusión a nivel estatal.

Debut del gallego-asturiano

Les primeres composiciones propies de L-R y Antón Menchaca, qu’interpreten davezu temes tradicionales adaptaos, tamién son mui esperaes polos aficionaos adultos, al igual que’l cantar en gallego-asturiano de Lorena Álvarez, natural d'Ibias, idioma que debuta en ‘Bestiariu’. Amás, otres bandes, como San Jerónimo, Buen Suceso o Rioturbio, faen en Bestiariu 3 les sos primeres composiciones en llingua asturiana, xunto a bandes que yá componen nesti idioma davezu como los clásicos La Tarrancha, o el Koku la manzana.

L’ilustrador Marco Recuero tornó a ocupase de la ilustración d’esti discu producíu por La Fabriquina y editáu por Araz.net, empresa editora tamién d’Asturies.com. La presentación en direuto de ‘Bestiariu 3’ va celebrase’l sábadu 30, a les 12 hores nel salón d’actos del xixonés Colexu Públicu Xovellanos, dientro del ciclu ‘Escenines pa la Reciella’ entamáu por ‘Reciella. Families pol Asturianu”.

La tienda en llinia Asturshop, onde tán disponibles los dos primeros ‘Bestiariu’, va poner a la venta esti discu tan esperáu’l mesmu miércoles, xunto col restu de puntos de venta.