Los alcuentros colos llectores de Villaviciosa comiencen con Santori

Va falar sobre '42.553: Depués de Buchenwald', obra que ganó l'últimu Premiu Máximo Fuertes Acevedo d'ensayu.

Los Talleres de Llectura n'Asturianu de Villaviciosa, entamaos pol Serviciu de Normalización Llingüística de la 'Comarca de la Sidra', comiencen el cursu actual con una charra-alderique de Xuan Santori sobre '42.553: Depués de Buchenwald'. L'Aula d'Asturianu del Atenéu Obreru de Villaviciosa tamién collabora nel entamu d'esti actu previstu pa mañana a les 19 hores na sala d'audiovisuales de la Casa de los Hevia.

Nesta obra l'autor recueye'l testimoniu vital de Vicent García (La Pola Siero, 1925), esiliáu republicanu deteníu en Francia y deportáu pola Gestapo al campu de concentración de Buchenwald, na contorna de la ciudá alemana de Weimar, onde munches persones perdieron la vida por mor del trabayu esclavu pa la industria de guerra nazi. 250.000 persones pasaron por él ente'l 1937 y el 1945, la mayoría por cuestiones polítiques.