Llaviana protagoniza’l primer númberu de la coleición ‘Terrén’ de l’Academia de la Llingua

Vicente Rodríguez Hevia, d’El Condao, ye l’autor qu’estrena con ‘La cultura tradicional en Llaviana’ esta coleición nueva de la institución académica. El llibru confroma “un corpus pernecesariu pal entendimientu cultural, social, económicu y territorial del conceyu”.

En ‘Terrén’ l’Academia de la Llingua Asturiana (ALLA) va atropar los trabayos de calter etnolóxicu llendaos a un territoriu xeográficu específicu firmaos pola mesma persona y que se tienen asoleyao a lo llargo los años nes estremaes publicaciones de la institución. Los de Rodríguez Hevia son los primeros que s’axunten nuna publicación, de nome ‘La cultura tradicional en Llaviana’, reconociendo asina tamién el so llabor investigador.

Nesti volume trátense temes rellacionaos col espaciu cultural tradicional: los periodos de la güerta y la collecha, l’usu del horru como’l foru del pueblu, la toponimia menor, etc. A ello amiéstase un repasu históricu del aprovechamientu de los recursos del ríu y el monte y una descripción de les celebraciones del conceyu de Llaviana.

Asina, con ‘La cultura tradicional en Llaviana’ “confórmase un corpus pernecesariu pal entendimientu cultural, social, económicu y territorial del conceyu de Llaviana”, apunten dende l’ALLA. En total tiráronse 246 exemplares del llibru, que cuenta con 312 páxines, nesta primer edición.