Llaviana aprobará una moción de sofitu a la oficialidá

El Plenu de Llaviana aprobará na tarde d’esti miércoles una moción de sofitu a la oficialidá na que qu’insta al Gobiernu y a les fuercies parllamentaries a algamar un consensu que lleve a una reforma del Estatutu, sumándose asina a otros conceyos. Llaviana tien anguaño paralizada la so ordenanza pola Delegación del Gobiernu estatal.

Somos Llaviana presenta esta moción, que toma como base la que llevó a Plenu Somos Avilés, a propuesta del ciudadanu René Durán en collaboración cola Xunta pola Defensa de la Llingua Asturiana (XDLA). Asina, la candidatura de xunidá popular apunta, nun primer puntu, “que ye’l momentu d’avanzar na oficialidá del asturianu como elementu fundamental pa la so dignificación normativa y la normalización social”, pa instar, nun segundu apartáu, “al Gobiernu d’Asturies y a les distintes fuercies polítiques con representación parllamentaria a entamar a un diálogu y llograr un consensu col fin d’algamar esti oxetivu, qu’acabaría cola reforma del Estatutu d’Autonomía d’Asturies nun procesu qu’incluya nel mesmu la oficialidá de la llingua asturiana”.

Izquierda Xunida, con 4 ediles, yá confirmó’l so sofitu a la propuesta, mentes que’l PSOE, con 8 –ente ellos l’ex alcalde Adrián Barbón, agora secretariu xeneral de la FSA, que sigue acudiendo a los plenos–, entovía nun confirmó’l so votu, que s’espera sía favorable o astención, lo que permitiría qu’ésta saliera alantre al contar Somos Llaviana con 2. Tamién tienen representación PP (2) y Foro (1), dos formaciones que votaron en xunu a favor de la Ordenanza Municipal d’Usu de la Llingua Asturiana de Llaviana –aprobada por unanimidá–.

Precisamente dicha ordenanza ta dende ochobre paralizada pola Delegación del Gobiernu estatal n’Asturies al considerala illegal, al igual qu’asocedió cola de Carreño, baxo l’amenaza d’acudir a los tribunales. A diferencia de lo acontencío nesti conceyu, la postura del PSOE llocal foi la de quedase de brazos cruciaos, camentando la posibilidá d’anulala, actitú que camudó tres los movimientos de Durán col sofitu de la XDLA y Iniciativa pol Asturianu, que provocó un cambiu de criteriu nos socialistes, que van tratar l’asuntu con un abogáu.

Villaviciosa y Uviéu, tamién

Tres aprobar esta moción, Llaviana va incorporase a una llista de conceyos que yá sofiten la oficialidá, na que tán Bimenes, Mieres, Xixón, Avilés, Noreña, Ḷḷena y Castrillón. Uviéu, nel que’l gobiernu municipal yá confirmó meses atrás el so sofitu nuna declaración institucional, tamién va llevalu a Plenu en febreru, al igual que va facer Somos Villaviciosa nel conceyu maliayu esta tarde.

Nesti casu, ye indispensable l'apoyu del PSOE (7 conceyales), qu'entovía nun se posicionó, yá que'l PP, con 8 conceyales, va votar en contra de la moción. Somos Villaviciosa y Foro, que va sofitar la propuesta, tienen 1 edil caún.

Semeya obra de Denis Soria baxo llicencia CC BY-SA 4.0.