Barbón vota a favor de la oficialidá en Llaviana y Vega declara’l so sofitu nidiu a la mesma en Villaviciosa

|
Votación moción en Llaviana

Los socialistes Adrián Barbón, secretariu xeneral de la FSA y conceyal de Llaviana, y Alejandro Vega, alcalde de Villaviciosa, apoyaron les mociones de sofitu a la oficialidá aprobaes ayeri en Plenu en dambos conceyos. El primer edil maliayu confesó que votó a favor de la mesma tamién nel Congresu de la FSA.

Llaviana y Villaviciosa suménse a la llista de conceyos qu’aprobaron mociones a favor de la oficilidá na qu’insten al Gobiernu y a los grupos parllamentarios de la Xunta Xeneral a algamar un consensu que lleve a una reforma del Estatutu, na que s’inclúin Bimenes, Mieres, Xixón, Avilés, Noreña, Ḷḷena y Castrillón, amás d’Uviéu, onde’l gobiernu municipal yá confirmó meses atrás el so sofitu nuna declaración institucional y tamién va llevar l’asuntu a Plenu esti febreru. En dambos, el PSOE sofitó ayeri les mociones presentaes poles candidatures de xunidá popular baxo la marca Somos.

Tolos güeyos taben puestos en Llaviana pola presencia de Barbón y la dulda sobre’l posicionamientu final del PSOE llocal, dada la so postura previa cola anulación de la ordenanza pola Delegación de Gobiernu estatal n’Asturies –aprobada por unanimidá en xunu– y nes comisiones. Finalmente la sopresa pondríala Foro pol so votu en contra y pola actitú del so únicu edil, Borja Álvarez Sueiro, calificada como “ofensiva” por René Durán, ciudadano que propunxo la moción en collaboración Xunta pola Defensa de la Llingua Asturiana (XDLA) y que presentó Somos Llaviana, mui diferente a la que presentó'l popular José María González Fernández, qu'emplegó l'asturianu nuna intervención "respetuosa" na qu'argumentó la posición del so partíu señalando que nun yera'l momentu de la oficialidá al nun considerala prioritaria nin necesaria anguaño.

Tolos conceyales socialistes votaron a favor d’una propuesta qu’afitaba nun primer puntu, “que ye’l momentu d’avanzar na oficialidá del asturianu como elementu fundamental pa la so dignificación normativa y la normalización social”, pa instar, nun segundu apartáu, “al Gobiernu d’Asturies y a les distintes fuercies polítiques con representación parllamentaria a entamar a un diálogu y llograr un consensu col fin d’algamar esti oxetivu, qu’acabaría cola reforma del Estatutu d’Autonomía d’Asturies nun procesu qu’incluya nel mesmu la oficialidá de la llingua asturiana”. Asina, salió alantre por 12 votos a favor –siete del PSOE, al contar con una ausencia,  más los yá confirmaos de Somos Llaviana (2) y Izquierda Xunida (3 por otra ausencia)– y 2 en contra –ún del PP (la vocera nun acudió) y el de Foro–.

En la Villa, “na presente llexislatura”

La moción presentada por Somos Villaviciosa yera práuticamente idéntica, con un matiz importante: incorporaba la frase “na presente llexislatura”. Esto nun foi inconveniente pa consiguir l’apoyu de los 7 conceyales socialistes, col alcalde Alejandro Vega a la cabeza.

El primer edil amosó na so intervención previa a la votación un apoyu nidiu a la oficialidá del asturianu, llegando a confesar que votó a favor de la enmienda presentada al congresu de la FSA por ‘Socialistes pola oficialidá”. La representante de Foro, María Ana López Montes, tamién se posición a favor de la igualdá de derechos de los asturfalantes, siendo’l Partido Popular (PP) la única de les cuatro formaciones con representación em Villaviciosa que votó en contra argumentado que cola Llei d’Usu y Promoción del Bable/Asturianu ye suficiente y que la cooficialidá contribuyiría a la medra del nacionalismu.

Al final, la propuesta salió alantre por 9 votos –los del PSOE (7) a los dos de Foro y Somos Villaviciosa– por 8, los del PP. “Tamos mui contentos, yo especialmente a nivel personal”, señaló l’edil de la candidatura de xunidá popular José Fernando Díaz ‘Pindy’, que destacó la posición “claramente favoratible a la oficialidá mostrada pol PSOE y l’alcalde” y el consensu esistente pa col asturianu nel Conceyu, cola esceición única d’un PP “que ta mirando yá a un procesu eleutoral na que la idea d’España, tres lo de Catalunya, va ser primordial pa ellos, zarrando files alredor de tolo que güela a autonomía”.

Na semeya, momentu na que se votó la moción sobre la oficialidá en Llaviana.

Contador Estadistiques