Llan de Cubel y Fred Morrison toquen n'alcordanza d'Argel

|
Cartelu Alcuentros de Bandes de Gaites N'Alcordanza Aurelio Argel Soto Rei

La Banda Gaites Soto Rei dedica esta edición del Alcuentru de Bandes de Gaites al so paisanu, fináu hai agora un añu.

El periodista y escritor, especialista en música folk d'Asturies y otros países, morrió'l 19 de mayu, dexando un vacíu enorme na familia de la música asturiana. Nel so pueblu tampoco nun lu escaecen, como amuesa esti homenaxe y el fechu de que la Casa Cultura llocal pase a llevar el nome d'Aurelio Argel.

L'actu de nomamientu del centru va tener llugar mañana, a les 20 hores. Darréu va entamase un conciertu n'alcordanza d'Argel cola participación de Fred Morrison y de Llan de Cubel, un cartelu de luxu pa recordar al de La Ribera, col que'l gaiteru escocés y los músicos de la formación asturiana guardaben una rellación d'amistá.

Bandes bercianes

El sábadu va tener llugar la VI Carrera de Monte 'Sierra Llagos', a les 11 hores. A les 15 hores ta prevista una xinta popular, mentes qu'a les 19 hores va comenzar el repartu del bollu, momentu amenizáu pola Bandina Xarangana.

A les 21 hores va tener llugar l'alcuentru de bandes de gaites, cola participación de la formación llocal y les bercianes Vega Espinaredo y El Castro Columbrianos.

 

Contador Estadistiques